الرئيسية > آراء > مذكرات كافر مغربي حصريا على كَود -3-: وأنا طفل فهمت بأن شحال ما يسحاب ليك عايش فالطوب دلقوادة، كون على يقين كاين شي ناس ما كرهاتش تكون غير بحالك
14/03/2019 10:00 آراء

مذكرات كافر مغربي حصريا على كَود -3-: وأنا طفل فهمت بأن شحال ما يسحاب ليك عايش فالطوب دلقوادة، كون على يقين كاين شي ناس ما كرهاتش تكون غير بحالك

مذكرات كافر مغربي حصريا على كَود -3-: وأنا طفل فهمت بأن شحال ما يسحاب ليك عايش فالطوب دلقوادة، كون على يقين كاين شي ناس ما كرهاتش تكون غير بحالك

هشام نوستيك-كود//

تجمعنا بحال الدجاج فدار أختي، دار ما مفهوماش واخا تبغي تفهم. مستحيلة رياضيا. دار فأكبر جزء ديالها ما عندهاش السقف، بحال يلا عايشين فالآثار ديال شي إمبراطورية قديمة. لبني ما كملوهش، ودفعو الدار للكراء، مع وعد كاذب أن البناية غا يجيو يسدو الثقبة السيمانة الجاية.. الشهر الجاي.. العام الجاي.. القرن الجاي.. يوم القيامة..

جوج بيوت “ديكابوطابل”، كوزينة ضحكة والواد الحار، أقصد الطواليط. أختي عندها الفكرة الخايبة ديال بيت الضياف. ضروووري يبقى واحد من جوج بيوت غير صالح للاستعمال. عادة قبيحة ما عندها تا معنى. “نورمالمون” الدار كلها مكان للعيش، ماشي متحف تايتسنى الزوار.

ما عمري حملت الزواق والرياء والنفاق ديال المغاربة. بيت الضياف، تسلف وتكلف باش تكرمهم، يحط ليك شي واحد كاس دلعصير خاصك تشرب غير نص الكاس باش ما تبانش جيعان. ولكن هادشي كامل حاجة وتجي خالتك وال troupeau ديالها يدوزو معاكم الصيف، دون سابق إنذار وبدون أخذ الموافقة، حاجة أخرى. الكارني ديال با براهيم مول الحانوت تايوليو فيه النوامر كثر من المعادلات دفيزياء الكَمّْ.

وبعد الجهاد كامل للي درتي معاهم، والهم والغم والنم، تاتسمع الهدرة على ودنيك. المغربي ديما تاينافق فالوجه، ويفرعك فالظهر.

البيت لي بقا هو غرفة الزوجية، يعني حنا المغضوب علينا، منا للدص فالمراح، للي كون ما كانوش الحيوط دايرين بينا، بحالو بحال الزنقة. لمراح كان فالمنطقة الخطيرة ديال ثقب الأوزون. منك للغربي. الجسد ديالك تايولي بحال مطعم وجبات سريعة للحشرات الضارة للي تاتفرخها المرجة، وعلى رأسها سراق الزيت الطائر. غير بسباب هاد بوجناح تقدر تفهم علاش الله خير الماكرين. تاينزل علينا بحال الجراد للي نزل على فرعون. ما تايتسوقش لبنادم ولا أي حاجة فطريقو، ضخم الجثة، وعزييز عليه العينين. فبعض الليالي الصيفية والله لا نعستي!

داك الشوية للي ناقص باش تكره النهار للي تولدتي فيه، تاتكملو شنيولة، واحد شنيولة تعرضات لطفرات جينية، كون عرفوها علماء البيولوجيا، كون فتحو مراكز بحث مرجاوية.

سراق الزيت الطيار وشنيولة المجنونة، هادو غير الحجاج للي تايزورونا يوميا، أما مالين الدار فحدث ولا حرج، ولكن بلا ما نعيفو بعضياتنا. المهم الدار كانت فيها دائما الحركة، سواء كنا فيها ولا ما كناش.

أختي وبعلها كان هذا جهدهم، حزقة لاروب للي تايشد الراجل، خصها تخلص الكرا والما والضو وتوكل ستة ديال الأفواه. بحال هاد العيشة فين غا تخلي شي فرصة لشي حياة زوجية عادية. الرومنسية تنتحر.

واللات ما عرفت كيف كانو تايقضيو حاجتهم الهرمونية فغرفة شبه عارية، وفالجهة الأخرى دلحيط قشلة ديال اللاجئين؟

كنا تانخلصو 200 درهم ديال لكرا، حنا كنا تنخلصو، أما الجيران، كاين للي ما خلصش كثر من عشر سنوات، وفين ما تايجي مول الدار يطلب فلوسو، تايخرجو ليه كلهم هازين الجناوة والمقالي.

تعيا ما تفكر وتتفهم الحالة ديالهم. واش بنادم ما عندو ما ياكل ويخلص لكرا؟ باهم كان كبير فالسن، ومازال خدام كارصون فواحد القهوة ديما خاوية. تايبان ليا كان داير ديك الخدمة غير سبة باش ما يمدش يدو للناس فالزنقة. ولادو كلهم خرجو من المدرسة قبل الشهادة ودارو carrière فالجريمة. ربما الحاجة الوحيدة لي نعاتب الواليدين عليها هي كثرة الولاد، واخا عارفين أنهم غير تايتعداو على الوقت.

كنت تانجي من المدرسة ما تيكون تا واحد فالدار – ما عاطينيش الساروت، حيت يلا لقيت الدار بوحدها تانرزيهم فالصابون البلدي – تانمشي عند الجيران ناكل الخبز غامل! تايرشو عليه شوية دالزيت الرومية وتايڭرملوه. أول مرة علفت معاهم داك الزمر، فهمت بأن كلشي نسبي فالحياة. شحال ما يسحاب ليك راك عايش فالطوب دلقوادة، كون على يقين أن كاين شي ناس ما كرهاتش تكون بحالك.

المأكل ديالنا كان معتامد بشكل أساسي على المواد التالية: أتاي.. وأتاي.. وأتاي.. نقدر نكون شربت شي ألف برميل ديال أتاي فصغري. ماشي أتاي الزوين لمشحر. أتاي البايت يومين وثلاث أيام، تا اللون ديالو تايولي كحل ثم أحمر ثم وردي. كاع الحاجات للي تايتعتابرو عاديين فالنظام الغذائي ديال الناس، كنت غي تانسمع بيهم. البيض، اللوز، مشتقات الحليب، البانان والفواكه عامة واللائحة طويلة.

الزوين فالدار المنكوبة ديالنا هو أن تا واحد ما زعم شي نهار يشفرنا. الشفرة عندنا فالدرب كانت نشاط عادي ومقبول أخلاقيا. تقدر تدخل لدار الجيران وتلقاهم تايطيبو بالكوكوت ديالكم.

حنا ما عمرنا تسرقنا حيت ما كاين ما يتسرق. أصلا يلا كنتي شفار وحفات ليك تشفرنا، غا تقتلك غير الروايح ديال بوخرارو. تنسى كاع علاش هرستي القفل ودخلتي.

الواد الحار كان مشكل دائم لا ينتهي. حنا ولاد المرجة كنا مولفين، لدرجة ختارعنا شحال من لعبة كان بوخرارو جزء لا يتجزء منها.

مرة فالعام تايتشاركو شي عشرة ديال الجيران فثمنمية دريال، وتايجيبو شي دري من الموقف، مْقيِّي عليه الزمان، يسْرّْح لقوادس. داك النهار تايطلع مزوهر. لحفير والسلوكة والخرواني، تايفتحو مجالات جديدة للمغامرات البَلْهرسِيّة.

غظيفة، مولات الدار، عروبية مخززة من سيدي سليمان، كانت تاترشق ليها تاتجي تعصر علينا النهار كامل. أختي كانت تاتصبر على عذابها باش ما تزيدش علينا لكرا. الوقت لي تاتدوز معانا كلو نكير و أوامر: طفي الضو!، سد الباب!، خرج شوف شكون تايغوت!.. ما تاتسكتش.

نهار كرات لينا الدار، بززات علينا نذبحو فروج لصحاب لمكان. باقي عاقل على الدمايات والجهل والتخلف. غظيفة ما تاتولدش وتايموتو ليها الرجال. داك الحنان دالأم للي فيها، كانت تاتفرغو فيا، ديما قاجاني تاتقول ليا “حُبِّينِي!” – بضم الحاء وشدة مكسورة على الباء.

مين كبرت شوية هاد فهمت المعنى، للي هو بوسني بالعروبية. بغات بوسة. يمكن بسبابها ركب فيا فيروس لمِّيمات، تا ديتها ألمانية.

الدار فيها بزاف دلمصايد للي تقدر تقتلك أو تتسبب ليك فعاهات مستديمة، أكبر مصيدة هي السلوكة ديال الضو للي كانو تايتعراو كثر من ميا خليفة. يا ويلك يلا قربتي من شي سلك! بحال يلا خدامين بالكهرباء اللاسلكية للي كان تايحلم بيها Tesla الله يرحمو. غير يوقع شي انقطاع فالكهرباء، عرف بأن شي واحد خوّرو الضو.

 

 

 

 

 

 

 

 

 

 

 

موضوعات أخرى