كود باريس ////
“كود” جمعات خبار على السكوندال للي دارو مهدي الريفي مدير وكالة التنمية الفلاحية فباريس صباح 23 فبراير 2025 فالجناح المغربي بالمعرض الدولي للفلاحة. كان النهار الثاني من معرض استضاف المغرب ضيف شرف. كان الافتتاح دارو الرئيس الفرنسي ماكرون مع رئيس الحكومة عزيز اخنوش وبحضور وزير الفلاحة المغربي احمد بواري وطبعا وزيرة الفلاحة ديال فرانسا.
بعدها كان جا وزير خارجية فرانسا بارو لافتتاح رسمي للرواق المغربي مع رئيس الحكومة. افتتاح مزيان وناجح.
لكن فالنهار الثاني غادي توقع لفضيحة. الريفي وصلات بيه الوقاحة حتى ولى كيغوت على اعضاء ديوان وزير الفلاحة اللي كانو ف”ڤي اي بي” ديال الجناح المغربي. حتى حد ما رد عليه. قرب منو هشام رحالي مدير الديوان ومدير مديرية الشؤون الادارية والقانونية بنفس الوزارة٬ دفعو وقال “يقود كلشي” وفق اكثر من مصدر ل”كود”٬ ودفع رحالي بطريقة فشي شكل.
وبحال ايلى ناس هاد الوكالة كانو موجدين سيناريو٬ ناضت٬ بعد شي 3 سوايع اقوى مرأة واسمها محجوبة شكيل ومكلفة بالمنتجات المجالية فيها٬ خرجات كتغوت. هادي ما عندها خدمة غير تلبس لحوايج وتجي تبندر وتلصق القنوات المعتمدة اللي كتجيبهم نفس الوكالة٬ باش دوز فنشرات الاخبار. كانت غادية تصطى وبقات تغوت. “كود” حضرات لهاد المشهد العبثي.
الامبراطورة محجوبة وصلات بيها الوقاحة وما بقاتش تفرق بين معرض للفلاحة حاضرات ليه مغربيات مقاتلات علي الوقت وخدامات فتعاونيات وبين اسبوع الموضة. جاية لابسة “كوتشي” وما جاوره للي ثمنو كيفوت سيمانا ديال المبيعات ديال هادوك المغربيات اللي فالرواق المغربي.
هاد محجوبة خاص ديما تعرض على الاعلام العمومي وخاص يستاضفوها او يكتبو شي قصاصة يمجدو فيها واخا ما كدير والو.
شوفو فين وصل الحال فهاد الوكالة.
فزيارة فرانسوا بايرو نهار الاثنين 24 فبراير 2025 للجناح المغربي٬ كانت هاد محجوبة كتسبق كلشي بما فيهم الوزير. شوفو الصورة باش تعرفو عقلية بحال هادو اللي اسسو جمهورية وسط وزارة الفلاحة.
