كود – كازا//

كشف المدير العام للمكتب الوطني للمطارات فندوة صحافية هاد الصباح فمطار محمد الخامس فكازا، عن مشاريع تطوير البنيات التحتية لمطارات المملكة، حيث ستنتقل قدرة مطار محمد الخامس من 14 مليون إلى 35 مليون مسافر مع 2029، كما سيتم، يضيف المسؤول نفسو، تطوير مطار مراكش من 8 ملايين مسافر حاليا إلى 16 مليون مسافر بحلول 2028.

مطار أكادير اللي كتوصل القدرة ديالو دابا من 2.5 مسافر سنويا غادي تنتاقل إلى 7 ملايين مسافر مع 2028، أما مطار طنجة اللي كتوصل القدرة ديالو إلى 2 مليون مسافر، فغادي تولي القدرة ديالو بحلول 2028 هي 7 ملايين مسافر.

أما مطار فاس، فغادي تنتاقل القدرة ديالو ف 2028 إلى 5 ملايين مسافر، بدوره مطار الرباط غادي تنتاقل القدرة ديالو من 2 إلى 5 ملايين مسافر ف 2025، أما مطار تطوان فغادي يولي قادر على استيعاب حركية مليون مسافر بحلول 2027، بدل 300 ألف مسافر حاليا يوضح المدير العام لمكتب المطارات.

مطار وجدة اللي يعتبر بوابة جوية للمنطقة الشرقية، غادي توصل القدرة ديالو، وفق الفقير، إلى 1.1 مليون مسافر ف 2037، أما مطار الناظور غادي يولي قادر على استيعاب 1.1 مليون مسافر ف 2045.

وكشف عادل الفقير عن أهم المشاريع التنموية اللي غادي تعرفها مطارات المملكة، بحال كازا اللي غادي يعرف مطارها، تشييد محطة جديدة على شكل محور، مدرج جديد، وبرج مراقبة حتا هو جديد، بالإضافة إلى نقل متعدد الاتجاهات ديال تي جي في.

أما مطارات مراكش وأكادير وفاس، يضيف المدير العام، فغادي تعرف كلها مضاعفة وإعادة تهيئة المحطة الحالية. أمام طنجة غادي يعرف تشييد محطة جوية جديدة. إنجاز هاذ المشاريع، غادي يكون بطبيعة الحال من خلال علاقات الثقة ف الشركاء المؤسساتيون ديال ONDA، والتزام العناصر البشرية ديالو، مع توظيف أحسن المواهب وأجود الأدوات وموارد التمويل عبر العالم.