كود سبور//

اعتبرت المديرية ديال التحكيم التابعة للعصبة الوطنية لكرة القدم الاحترافية، أن القرارات التحكيمية اللي كانت فماتش الوداد واتحاد طنجة السبت الماضي فتيران العربي الزاولي، كانت قرارات صحيحة، وأنه ما كان حتى بينالتي للوداد فهاد الماتش بالمقابل بينالتي اتحاد طنجة صحيح.

ووضحت مديرية التحكيم أن الحالة اللي كان فيها احتكاك بين مدافع اتحاد طنجة ومدافع الوداد فمنطقة العملية، ما فيها والو، وقالت عليها: “كان الاحتكاك بين مدافع اتحاد طنجة ومهاجم الوداد ولكن احتكاك عادي وجا من بعد لعب الكورة وما كاينش بينالتي، وعدم الإعلان عن ضربة جزاء من الحكم وتأكيد غرفة الفارّ للقرار ديالو كان قرار صحيح”.

وبخصوص بينالتي اتحاد طنجة اللي ماركاو منو هدف التعدل، قالت مديرية التحكيم: “الكورة كانت هوائية وبين لاعبين، مهاجم اتحاد طنجة قدر يسيطر على الكورة بالصدر ديالو وما كاينش تسلل وما كايناش لمسة يد وكاين احتكاك باهمال وكانت عرقلة من الركبة ارتكبها مدافع الوداد وبالتالي الإعلان عن ضربة جزاء كان قرار صحيح والمصادقة عليه من طرف غرفة الفار كان ايضا قرار صحيح”.