كود ـ كازا//

كشفت المديرية العامة للأمن الوطني أن حوالي 50 ألف مخالفة سير تسجلات فالأسبوع الأخير، ودخلت لصندوق الدولة أزيد من 9 ملايين درهم، فإطار مراقبة الطرق والجولان.

وحسب بلاغ المديرية، فالأسبوع الممتد من 17 حتى 23 نونبر، وقع 2264 حادثة سير فالمناطق الحضرية، مخلفين 43 قتيل و3042 جريح، منهم 125 إصاباتهم خطيرة.

الفرق المرورية حولت للنيابة العامة 8524 محضر، واستخلصت 41438 غرامة تصالحية، وتوصل المحجز البلدي بـ4775 عربة، وتسحبت 8524 وثيقة، وتوقفت 467 مركبة.

وحسب البلاغ، الأسباب الرئيسية لهاد الحوادث كتجي بالدرجة الأولى من عدم انتباه السائقين، عدم احترام حق الأسبقية، السرعة المفرطة، قلة الانتباه عند الراجلين، عدم ترك مسافة الأمان، عدم التحكم فالعربة، تغيير الاتجاه بلا إشارة، وحتى تغيير الاتجاه فأماكن ممنوعة.

كذلك كاين أسباب أخرى بحال عدم احترام علامة “قف”، السير فالطريق الممنوع، السير فاليسار، تجاهل الضوء الأحمر، السياقة فحالة سكر، والتجاوز المعيب.

غرامات مخالفات السير كتختلف حسب نوع المخالفة ودرجتها، وكاين تخفيض إذا خلصت الغرامة مباشرة:

الدرجة الأولى: 700 درهم، وتولي 400 درهم فالدفع المبكر.

الدرجة الثانية: 500 درهم، وتولي 300 درهم فالدفع المبكر.

الدرجة الثالثة: 300 درهم، وتولي 150 درهم فالدفع المبكر.

تقرير وزارة الداخلية الأخير على السلامة الطرقية كشف أن عدد العربات لي تسجلات ليها مخالفات كيتزاد كل عام. سنة 2024 وصل العدد لـ2.3 مليون عربة، وزاد لـ2.8 مليون عربة ف2025. الوزارة متوقعه يوصل لـ2.9 مليون عربة ف2026 و2.96 مليون عربة ف2027.

مع ذلك، التقرير شد أنه هاد الأرقام ما كتعكسش كل المخالفات فالطرق، حيث كتسجل غير المخالفات لي شافوها وضباط الأمن وعطاوا عليها محاضر رسمية، وما كتشملش المخالفات لي ما تسجلاتش.