عمر المزين – كود //

دارت المديرية العامة للأمن الوطني خطوة جديدة باش تطور الخدمة الأمنية وتقوي الاستعداد ديالها لمواجهة الأحداث الكبرى والأزمات، مني علنات  على إحداث مصلحة خاصة كتتكلف بتدبير القاعة المركزية للأحداث الكبرى والأزمات، داخل المقر المركزي ديالها.

هاد القاعة الجديدة عبارة على مركز قيادة متطور ومجهز بتكنولوجيا حديثة وشاشات عملاقة، كتجمع مجموعة من الأنظمة المعلوماتية والتطبيقات الذكية، وكتسمح بمراقبة كاميرات المراقبة الحضرية فمختلف مناطق المغرب بشكل مباشر وفالوقت الحقيقي. وزيادة على هاد الشي، كتربط القاعة جميع وسائل الاتصال السلكية واللاسلكية اللي كتعتمد عليها البوليس، وكتوفر الولوج المباشر لقواعد المعطيات الأمنية، باش تكون المعلومة متوفرة بسرعة وبالدقة المطلوبة.

وكيشرف على هاد المنصة فريق من موظفي الشرطة اللي دازو تكوينات متخصصة فالتعامل مع الأحداث الكبرى وتدبير الأزمات. وكيضم هاد الطاقم كفاءات قادرة تتعامل مع أنظمة المراقبة بالكاميرات والطائرات المسيرة، المعروفة بالدرونات، فضلا على التحكم فشبكات الاتصال واستغلال المعطيات الأمنية.

وعلى المستوى العملي، غادي تكون من بين المهام الرئيسية ديال هاد المصلحة إعداد وتطوير خطط وبروتوكولات للتعامل مع مختلف الحالات الطارئة، سواء تعلق الأمر بتظاهرات كبرى أو أزمات أمنية مفاجئة. وهاد الخطط غادي تخضع لتداريب وتمارين محاكاة بشكل مستمر على مدار العام، باش يكون التنسيق بين مختلف المصالح سريع وفعال، ويكون التدخل الميداني فالتوقيت المناسب.

وكيجي إحداث هاد المصلحة الجديدة فإطار تحديث البنيات الأمنية وتطوير وسائل الاشتغال داخل المقر المركزي الجديد للأمن الوطني، بهدف الرفع من الجاهزية والاستباقية، وتحسين تدبير الأحداث الكبرى والأزمات، وضمان تدخل أمني سريع ومنسق لحماية المواطنين والحفاظ على النظام العام.