محمد سقراط-كود///

نهار السبت لي داز واحد الصديق حصلاتو الشتا في حدا الرومبوان دأكورا  هنا في فاس في طريق صفرو، هاديك المنطقة غرقات وهو نيت كان غادي يحصل ونزل صور فيديو لهاد الكارثة، بحكم أنها بشرية فيها إهمال وتقصير من لاراديف والجماعة حيت الشتا لي طاحت داك الوقت ماشي ديال الفيضان، ولكن للأسف فاس يكفي حرفيا جوج قطرات ديال الشتا باش تغرق المدينة، صاحبي صور فيديو وسيفطو ليا حطيتو في صفحة كود على تيك توك وهو يتفركع، المشاهدات فاتت مليون والتعاليق بالمئات وكلها تشكك في مصداقية الفيديو، وبأنه كذوب وتجني علىة مدينة فاس الرائعة الطاهرة الحديثة، والفيضان راه كيوقع حتى عند العائلات والديور والدول الكبرى وحتى هوما كيغرقو ليهم الطوموبيلات، وبلي الفيديو باين في كازا لأن الطاكسي حمر على أساس ديال فاس غوزأنديان، والعديد من المبررات الواهية لي كتعطي فكرة على عقلية سكان هاد المدينة التعيسة وكيفاش كيشوفوها كوردة بينما في الحقيقة هي خربة ومقبرة لأحلام الشباب، وحفرة موت للمراهقين.

مدن الشمال البنية التحتية فيها من الأحسن في المغرب ومع ذلك سكان المدن دائموا الشكوة وتطفى غير بولة عمومية في الشارع كيديرو عليها حالة حتى تقاد في بلاصتها، كيبغيو المدن ديالهم وعندهم اعتزاز كبير بيها وكيحافظو عليها، هنا في فاس الى كتبتي مثلا راه فاس مخربة كيدخل عندك ولد لميمة ساكن في زليليك ويقوليك المخربة هي مك فاس حاكمة العالم وزامتة المغرب، علما أنه ساكن في الخلا والقفار ومابقاتش حومتو كاريان غير تالهنا وهنا، كذلك في الصفحات كنبقى تسمع فاس فيها مايتشاف فاس واعرة فاس زوينة فاش كيسولهم شي واحد راني جاي لفاس وبغيت نتسارى مكيلقاو مايقولوا ليه من غير مولاي عقوب وسيدي حرازم لي كلو مفرش حصاير بحال شي سيد مكاين حتى فين توقف تصنت لعظامك، والمدينة القديمة لي يمكن نعتابروها من أكثر المدن العتيقة المهملة في المغرب وكتنافس مع مكناس وصفرو في هادشي.

الفيديو لي حطات كود على صفحتها في تيك توك هو لمدينة فاس ولمدار أكورا بالظبط مدار حيوي في المدينة وفاض عليه الما رغم أن التساقطات لم تكن كثيرة، والسبب واضح هو تقصير لاراديف والجماعة والمسؤولين، والمدينة أصلا كلها مخربة وخالية من أماكن الترفيه وجودة الحياة فيها في الحظيظ ولا تقارن مع مدن مغربية أخرى كانت غير عروبية فاش كانت فاس مدينة في قرون خلت، ومع ذلك كنلقى ناسها كيدافعوا عليها وتجيهم الغيرة عليها إلى نتاقدها شي حد، ومكتجيهمش الغيرة عليها فاش كيصوتوا على البوصيري والفايق وشباط لي سمح فيهم وزاد مابقاش رجع حتى طل عليهم.