كود سبور- الجديدة//

عبر الفرنسي هوبير فيلود مدرب الجيش الملكي، على الفرحة ديالو بالتعادل اللي حقق الفريق أمام ماميلودي صن داونز الجنوب إفريقي برسم الجولة 2 من دور مجموعات دوري أبطال إفريقيا، وخا الماتش كان بميدان الفريق العسكري فتيران العبدي بالجديدة، ولكن وضح أن الظروف د المباراة وضد فريق قوي بحال صن داونز كاتخلي النقط اللي خداوها مهمة.

ووضح فيلود مدرب ليفار بعد تعدلهم مع صن داونز واحد لواحد وقال فتصريح له من بعد الماتش: “كان ماتش قاصح، وكنا في الموعد خصوصا وأننا وجدنا لفريق قوبي بقيمة صن داونز، وبالنسبة لأطوار الماتش ما دروش علينا خطورة كبيرة غير بعض لمرات، وواخا درنا شي أخطأ ولكن كنا كانبنيو الهجمات مزيان والخصم كان متماسك، وكنا نقدرو نماركيو عليهم حنا الأولين ولكن مع الأسف ماركاو علينا بخطأ فردي”.

وكمل مدرب الجيش الملكي وقال: “أنا فرحان برد فعل الفريق ديالي سواء دفاعيا أو هجوميا. دافعنا مزيان وگاع اللاعبين دارو داكشي اللي مطلوب منهم ومزيان، وكنا باغيين نربحو باش الوضع ديالنا يزيد يكون احسن فالكلاسمون، ولكن التعادل مع فريق بقيمة صن داونز كايبقى نتيجة إيجابية، والفرق فالگروب ديالنا متقاربين بزاف، ولكن غانخدمو باش نجمعو أكبر عدد من النقاط فالماتشات الجايين وحنا واجدين باش نعطيو أداء احسن ونتائج أحسن”.