كود سبور//

عاود أكد مدرب منتخب كرواتيا زلاتكو داليتش أن من حق المنتخب الوطني المغربي يحلم بالتتويج بكأس العالم فمونديال 2022، فحالو فحال كرواتيا وأي منتخب فهاد البطولة، والمغرب ماشي استثناء حيث عندو منتخب قوي ولاعبين واعرين.

وتحدث زلاتكو داليتش فالندوة الصحافية اللي كتسبق ماتش نصف نهائي كأس العالم قطر 2022، بين كرواتيا والأرجنتين وقال: “قلت بزاف ديال المرات وغادي نعاود نقولها، راه أي واحد فهاد الدنيا من حقو يحلم، المنتخب الكرواتي حقق هاد الحلم قبل 4 سنين لبلاد صغير ومنحنا لبلدان أخرى الحق باش يحلمو وحتى واحد ما كان كيتوقع توصل كرواتيا للفينال فمونديال 2018، وكلشي من حقو يحلم والمغرب ماشي استثناء، حيث عندهم طريقة لعب متميزة ولعابا واعرين وربحو إسبانيا والبرتغال راه المغاربة عندهم منتخب واعر وعندهم الحق يطمحو يربحو كأس العالم، وحتى حنا عندنا نفس الحلم”.

وكان المدرب الكرواتي زلاتكو داليتش نوه بالمنتخب الوطني المغربي من بعدما لعب معاه أول ماتش فمونديال قطر 2022، وكان اعتبر من بعد المباراة اللي سالات تعادل فدور المجموعات أن نقطة من الماتش ضد المغرب ثمينة بزاف حيث المنتخب المغربي قوي وعندو لعابا واعرين وفالدور الثاني قال بلي المغرب من حق يربح كأس العالم، ودابا وصلو المنتخبان لنصف نهائي البطولة وغادي يلعب المغرب ضد فرنسا، وغادي تلعب كرواتيا ضد الأرجنتين.