كود سبور- الجديدة//

هنأ مانكوبا مانگيتي مدرب ماميلودي صن داونز الجنوب إفريقي، فريق الجيش الملكي على التعادل اللي فرضو عليهم فالماتش اللي لعبوه بيناتهم، البارح السبت فتيران العبدي بالجديدة برسم الجولة 2 من دور مجموعات دوري أبطال إفريقيا، وأكد أنهم غايربحو الرجاء الرياضي فالماتش الجاي ضمن الجولة 3.

وبعدما سالا الماتش بين الجيش الملكي وصن داونز الجنوب إفريقي بالتعادل الإيجابي واحد لواحد، هضر مدرب الأخير وقال فتصريح له: “لعبنا ضد فريق مزيان ومبروك للجيش الملكي، حيث خداو نقطة التعادل، واخا أنا كايبان ليا أنه كنا نستاهلو الرباح، قدمنا مستوى مزيان وخلقنا فرص للتسجيل وخدمنا مزيان وكنا نقدرو نديرو احسن”.

وبخصوص الماتش الجاي ديالهم ضمن الجولة الثالثة ضد الرجاء الرياضي، قال مدرب صن داونز: “ضروري نربحو الرجا وأنا فرحان الصراحة مللي تعادلو مع مانييما حيث كون وقع العكس كنا غانلقاو ريوسنا فوضع حرج وأكيد الماتش ضد الخضرا غايكون صعيب”.