كود سبور//

كيحاول لويس دي لافونتي مدرب إسبانيا يمتص غضب الشارع الرياضي الإسباني عليه وعلى الاتحاد الإسباني لكرة القدم، بعدما فشلو فإقناع نجم ريال مدريد إبراهيم دياز اللي اختار يلعب للمغرب وفضلو على إسبانيا، وبدا كيحاول يبرد الجمهور الإسباني وقالهم بأن اللاعب خاصو يكون باغي يلعب للمنتخب وبلا شروط، وعطى مثال بلامين يامال نجم البارصا مول 16 عام اللي من أب مغربي وأم غينية وقرر يلعب لإسبانيا.

لويس دي لافونتي وبعدما قال إنه كيحترم قرار إبراهيم دياز واعترف بخسارة الموهبة ديالو بعدما قرر يلعب مع المغرب، حاول يخفف من ضغط الشارع الإسباني وغضب الجماهير الإسبانية عليه وعلى الاتحاد الإسباني بسبب دياز، وبالحديث على لامين يامال لاعب البارصا، وقال فتصريح نشراتو جريدة موندو ديبورتيفو الشهيرة: “لامين يامال مقتنع باللعب معنا، وكياكد هذا الشي فكل ماتش”.

وكمل مدرب إسبانيا: “خاصك تكون فخور وأنت فالمنتخب الوطني وتقدر أنك كاين فيه وأنه شحال صعيب تجيك هاد الفرصة حيث كاينين لاعبين مزيانين وكيبقاو برا المنتخب وخاصك تكون عارف هذا الشي باش تكون فخور”.