كود هناء ابو علي ///

توقعت مصادر “كود” باللي غادي يكون تمديد لجوج مدراء مواقع وشي وحدين خراين تشدو فقضية ابتزاز ملياردير عا تا جا اسمو احمد الطرمباطي ليلة الثلاث اللي فات. هاد التمديد وفق مصدر “كود” عندو علاقة باللي البارح الفرقة الوطنية للشرطة القضائية سمعات لعدد من رجال الاعمال تجبدو فالتحقيقات. اليوم فالصباح غادية تكون مواجهات بين هادو اللي قالو باللي تعرضو للابتزاز وبين هادوك المتهمين بالابتزاز. 

دابا كلشي بريء. يقدر يكون شي وحدين من اللي مشدودين يخرجو براءة. دابا غير اتهامات. كلام ضد كلام فانتظار الادلة المادية اللي غادية تبان فالتحقيقات.

دابا لحد الان اللي متهمين كاين مدير موقع “علاش تيفي ” اسمو القاسمي وكاين حاتم حجي اللي عندو “لونكيط” وشي وكالة واخرين. يمكن الاستماع يشمل بالاضافة الى رجال الاعمال عليهم شي مسؤول امني ومسؤولين قضائيين كلهم تجبدو فالتحقيقات وكانت عند بعضهم علاقات قوية بهاد الجوج. 

هاد حجي مع القاسمي كانو دارو داك الفيلم الشهير ديال ولد الكرية =واحد من مغني اغنية عاش الشعب=. مشاو عندو وصور فيديو فيه قال ولد الكرية باللي نادم ووو .

وعطاو بلا حيا بلا حشمة هاد حجي وثيقة فيه باللي تم اعتمادو مراسل لوكالتو ففاس وعطاه رخصة باش يصور. هنا ما شفنا لا النقابة لا المجلس الوطني للصحافة لا النقابات الاخرى للصحافيين كتحج على هاد الشي. طبعا حتى الدولة سكتات على هاد الضصارة على مهنة الصحافة.

فالفيديو الشهير كان ولد الكرية جالس بين حجي والقاسمي. بجوجهم عندهم بطاقة الصحافة. المجلس الوطني للصحافة قال ل”كود” باللي خداوها حقاش كانت عندهم الشروط القانونية. عندهم الحق. خاص تطبيق القانون. حتى اليوم مازال غير متهمين

القضية تخلطات. واش قضية عادية ولا حروب بالنيابة بين القضاة او حروب بالنيابة بين اجهزة فالدولة. ايلى النيابة العامة بغات التحقيقات تمشي حتى اللخر راه صحاب الفرقة الوطنية عندهم التجربة والحرفية باش يمشيو بعيد.
وفق مصدر “كود” فمن بين اللي استامعو ليهم محمد بودريقة رئيس الرجاء السابق اللي قال باللي تعرض لابتزاز. طلب منو واحد من المعتقلين ابارت اييه شقة باش ما يبقاوش يكتبو على قضية النوطيرة اللي دخلات الحبس وكانت على خلاف معاه. 
كاين كذلك بالاضافة الى الطرمباطي اللي عطاهم  وفق مصادر “كود” كثر من 80 مليون. باش دار الفخ كان عطاهم شي عشرين مليون٬ كاين رجل الاعمال الجامعي اللي عندو العقار فكازا. هادا كاين اخبار كتقول باللي داو ليه اكثر من 120 مليون. هادي غير تهم مازال التحقيقات تبين اش وقع بالضبط.
كاين رجل اعمال كيخدم فالعقار كانو داو ليه تقريبا 16 مليون سنتيم باش ما يبقاوش يخرجو ليه صورتو. بالاضافة الى مستثمر لبناني عندو مطاعم. هادا يمكن الوحيد اللي قدم شكايات ضد حجي بعد ما بداو يبتزوه. 
هاد اللائحة تقدر تزاد اليوم.
غير شي وحدين من هاد رجال الاعمال كانو عطاو وسكتو. خاص التحقيقات معاهم علاش سكتو. علاش ما خبروش البوليس. خاص هيئة محاربة الرشوة تدخل فهاد القضية وتابع بعض هاد رجال الاعمال. 

اللي قدم شكاية راه فضل دولة الحق والقانون واللي ما قدمش الشكاية راه متورط مع هاد الاشخاص