وكالات//
تشافى الممثل الأمريكي المعروف بروس ويليس، اللي عندو دابا 70 عام، مؤخراً فـ لوس أنجلوس، فـ أول ظهور علني ليه من بعد شهور طويلة.
هاد الظهور جا من بعد واحد المنشور مؤثر اللي دارتو مراتو إيما هيمينغ ويليس فـ إنستغرام فـ “يوم الأب”، وتكلمات فيه على التحديات الصحية اللي كيعيشها بروس بسبب المرض ديال الخرف الجبهي الصدغي (FTD)، اللي تشخص بيه قبل أكثر من عامين.
فالسنين الأخيرة، بروس ويليس بقى بعيد على الأضواء، وكنّا كنشوفو صور قليلة ليه من طرف عائلتو على مواقع التواصل. ولكن نهار الثلاثاء اللي فات، فـ العشية، تشاف نجم فيلم “داي هارد” وهو داير جولة هادئة فالطوموبيل ديالو فـ لوس أنجلوس، وكانو معاه الحراس الشخصيين ديالو.
الناس تفاعلو بزاف مع هاد الظهور ديالو، خاصة حيث ما بقاش كيبان فالعلن بزاف من نهار تعرّف عندو مرض الخرف فـ فبراير 2023.
وفواحد المنشور مؤثر، إيما نشرت صورة قريبة لبروس مع وحدة من بناتهم، ووجهات التحية لكل الآباء اللي كيتعايشو مع أمراض أو إعاقات، وقالت:
“عيد أب سعيد لكل الآباء اللي كيتعايشو مع المرض أو الإعاقة، وكيبيّنو قدراتهم بطريقتهم الخاصة، وللوليدات اللي كيساندوهم.”
وزادت وقالت أن بروس باقي كيعلّم بناتو قيَم كبيرة بحال الصمود، والحب اللي ما عندوش شروط.
