أنس العمري-كود///

حبط بوليس تطوان، اليوم الأربعاء، مخطط إرهابي خطير كان قريب يتنفذ، بعدما شد شاب موالي لتنظيم “داعش”، بناء على معلومات استخباراتية دقيقة وفراتها لمديرية العامة لمراقبة التراب الوطني.

الشاب عندو 26 عام، وكان فطور تنفيذ واحد المخطط التخريبي الخطير اللي كان غادي يهدد بشكل كبير النظام العام.

ووفق البلاغ ديال المكتب المركزي للأبحاث القضائية، العملية الأمنية أسفرت على العثور عندو على سلاح أبيض كبير، وكان ناوي يستعملو فمشاريعو إرهابية، خصوصا وأنه كان كينشر فمنصات التواصل محتويات كتشيد بعمليات “داعش”.

وخلال التفتيش فالدار ديالو، لقات الشرطة راية كتدل على الانتماء لهاد التنظيم الإرهابي.

وتحال المشتبه فيه على المكتب المركزي للأبحاث القضائية، اللي دار ليه الحراسة النظرية تحت إشراف النيابة العامة المكلفة بقضايا الإرهاب، باش يكملو البحث معاه ويكشفو جميع المخططات اللي كان كيسعى ينفذها، وكذا ارتباطاتو الممكنة داخل المغرب أو خارجه.

وكتبين هاد القضية مرة أخرى تنامي المخاطر الإرهابية اللي كتهدد المملكة.