كود – كازا ///

قالت مواقع إسبانية، أن بارون مخدرات تجبد ف ملفات منير الرماش وشريف بن الويدان وتعتاقل سابقا ف إسبانيا سنة 2000 بسباب مذكرة اعتقال دولي صادرة عن السلطات القضائية المغربية، تشد بالصدفة ف كازا بسباب مخالفة مرورية.

وأضافت المصادر ذاتها، أن تنقيط السمية ديالو من طرف البوليس كشف بأنه مبحوث عنه دوليا بسباب التهريب والاتجار الدولي ف المؤثرات العقلية. وقبل سنوات تمكن المعني بالأمر باش يدخل سبتة بعد تمويه البوليس ببطاقة إقامته الهولندية، ثم حرگ بفلوكة ديال الصيد إلى طنجة.

وحسب المصادر ذاتها، هاد بارون المخدرات (م. م)، أصلو من الحسيمة وكان معروف وسط عصابات التهريب ف التسعينيات ديال القرن الفايت، وف 2000 تشد ف إسبانيا وقدر يهرب بتنسيق مع أفراد الريزو اللي كان مسؤول عليه ف أوروبا.