كود – سبتة//

بينات معطيات جديدة خارجة من المعهد الوطني للإحصاء فإسبانيا أن مدينة سبتة كتعيش واحد التحول فالبنية السكانية ديالها، واللي كيبان حتى من خلال الأسماء الأكثر انتشاراً بين السكان، ففئة الرجال، كيبقى اسم “محمد” متصدر الترتيب بفارق كبير، حيث وصل العدد ديال المسجلين بهاد الاسم لـ2590 شخص، بمعدل 61,5 فكل ألف رجل، وهو رقم كيفوت بشكل واضح أقرب المنافسين.

فالمركز الثاني كيجّي “فرانسيسكو خافيير” بـ757 حالة، من بعدو “أنطونيو” بـ718 و”مانويل” بـ689، ثم “أحمد” بـ551. اللائحة كتضم حتى أسماء أخرى بحال “فرانسيسكو” (528)، “خوسي” (473)، “خوسي أنطونيو” (445)، “رافاييل” (421) و”خيسوس” (406)، و’’مصطفى” اللي وصل لـ430 حالة. هاد الأرقام كتأكد التعايش الواضح بين أسماء ذات مرجعية إسلامية وأخرى كاثوليكية وسط نفس الفضاء الحضري.

وبالنسبة للعيالات، كيتصدر اسم “فاطمة” الترتيب بـ763 حالة، بمعدل 18,4 لكل ألف امرأة، من بعد كيجّي اسم “ماريا كارمن” بـ716، و”ماريا” بـ664 مورراهك و “سارة” بـ461 و”مريم” بـ458، عاد  أسماء بحال “آنا ماريا” (420)، “آنا” (361)، “كارمن” (342)، “أفريقيا” (315) و”إيزابيل” (301)، عاد سميات  أخرى بحال “مليكة” (286)، “لوسيا” (283)، “ماريا دولوريس” (280)، “نور” (268) و”كريستينا” (266)..

تاريخياً، كتبيّن نفس المعطيات أن سبتة عرفات تحول كبير فاختيارات الأسماء، فخمسينات القرن الماضي، كانو أسماء بحال “أنطونيو” بمعدل 56,8 لكل ألف مولود، و”فرانسيسكو” بـ55,5 و”مانويل” بـ49,9، اما اسم “محمد” كان حاضر ولكن فمرتبة متأخرة بـ37,7، غير هو فالسبعينات  ولى “محمد” الاسم الأول بـ49,8 لكل ألف مولود، ومن داك الوقت وهو محافظ على الصدارة.

هاد المؤشرات الرقمية كتعكس أن سبتة مدينة كيتلاقاو فيها جوج مكونات ثقافية رئيسية، واللي كيبان تأثيرهم حتى فاختيارات بسيطة بحال تسمية لوليدات.