ݣود ـ بني ملال//

محكمة الاستئناف فكازا عيّطات على مجموعة ديال الناس، من بينهم بعض أعضاء المجلس الجماعي ديال بني ملال وموظفين ومقاولين، باش يمثلو قدّام قاضي التحقيق فالمحكمة ابتداء من الأسبوع الجاي، فملف معروف عند سكان جهة بني ملال خنيفرة باسم قضية “أحمد شد”، الرئيس السابق لجماعة بني ملال اللي تشد قبل أربع شهور فحبس كازا، مع مهندس سابق للجماعة ومسير واحد الشركة ديال النظافة، وكلهم متابعين فملف تفويت أراضي واختلاس وتبديد أموال عمومية.

ووفق مصادر مطابقة، قاضي التحقيق عيّط لأكثر من 40 شخص مقسّمين على أربع دفعات باش يمثلو قدّامو فهاد القضية اللي كتعلق بالفساد فالتسيير المحلي بجماعة بني ملال.

المعنيين غادي يمثلو قدّام القاضي يومي الثلاثاء والأربعاء 7 و8 أكتوبر، من بينهم موظفين بالجماعة ومقاولين عندهم صفقات مع الجماعة، ومن بعد يوم الخميس 9 أكتوبر غادي يستقبل قاضي التحقيق مجموعة 17 اللي تم الاستماع ليهم فبداية هاد الملف من طرف وكيل الملك فشهر ماي اللي فات، من بينهم مستشارين بالجماعة وموظفين ومقاولين كل واحد فملفه، وفهاد المرحلة أمر باعتقال الرئيس السابق والمهندس ومسير الشركة، وباقي الناس تحوّلوا للشرطة القضائية باش يكملو البحث، ومن بينهم اللي خلّص كفالة مالية للمحكمة.

ونهار الاثنين 13 أكتوبر غادي يمثّل الرئيس السابق المعتقل قدّام نفس القاضي باش يكمل التحقيق، حيث باين أن محكمة الاستئناف فكازا استجابت لمذكرة رئاسة النيابة العامة اللي أمرت المحكمة باش تباشر بشكل عاجل جميع قضايا الفساد المتعلقة بالمال العام.

هاد القضية اللي بينات الفساد لي طاغي فالتسيير المحلي بجماعة بني ملال، تزادت ليها قضية جديدة على شبهة فساد فإصلاح وتهيئة شارع محمد السادس، وملف منح رخصة لعمارة، اللي طرحو واحد عضو من الجماعة فسؤال شفوي مباشر لمجلس المستشارين موجه للوزير ديال الداخلية. ومن بعد أسبوعين، رسل وزير الداخلية لجنة تفتيش للجماعة باش يديرو تحقيق لمدة ثلاثة أسابيع، ومن بعد رفعو تقريرهم للوزير اللي غادي يعلن على النتائج فجلسة بمجلس المستشارين.