الرئيسية > كود سبور > محسوبين على الخضرا تعداو على البوليس فتطوان وهرسو الطوموبيلات – فيديو
24/02/2024 19:00 كود سبور

محسوبين على الخضرا تعداو على البوليس فتطوان وهرسو الطوموبيلات – فيديو

محسوبين على الخضرا تعداو على البوليس فتطوان وهرسو الطوموبيلات – فيديو

كود سبور//

ناضت بمحيط تيران سانية الرمل فتطوان بين محسوبين على جمهور الرجاء الرياضي والبوليس والقوات المساعدة، وهذا الشي قبل ماتش المغرب التطواني والرجاء ضمن الدورة 21 من البطولة الاحترافية لكرة القدم.

https://www.facebook.com/share/v/wAJ63RAPqeqpiBbX/?mibextid=WC7FNe

وعكس التعليمات اللي نشرو الرجاء الرياضي البارح الجمعة هما و “الكورفا سود” المساند للفريق الاخضر، للجماهير الرجاوية على أن المشجعين اللي ما عندهمش التذاكر بلا ما يمشيو لتطوان، وان الجماهير اللي غتمشي تفرج فالماتش امام المغرب التطواني فتيران سانية الرمل خاصها تحترم مدينة تطوان والساكنة ديالها وإرشادات السلطات، فعكس هذا الشي كامل مشاو بزاف ديال الرجاويين لتطوان والعدد ديالهم تقدر بأكثر من 3000 واحد، واللي أغلبهم ما تسمحش لهم يدخلو للتيران حيث ما عندهمش تذاكر، بحكم ان الطاقة الاستيعابية ديال التيران محدودة بالمقارنة بالعدد ديال الجماهير اللي جاي من كازا لتطوان، وملي تمنعو من الدخول محسوبين على الرجاويين نوضوها مع البوليس والقوات المساعدة بمحيط تيران سانية الرمل، وضاربو معهم وشيرو على الطوموبيلات ديال الأمن بالحجر.

ومن المنتظر تكون اعتقالات للمشاغبين والمتورطين فهاد أعمال الشغب، ويتفتح تحقيق باش تعرف ظروف وملابسات هذا الاحداث اللي كتخسر صورة الكورة المغربية وتسيء حتى للمجتمع المغربي، خصوصا وان الرجاء والگروبات “گرين بويز” و “إيگلز”، نبهو الجماهير الرجاوية وحذروهم من التسبب فشي إنفلاتات وقالو لهم اللي ما عندوش تذاكر ما يمشيش للتيران.

موضوعات أخرى