كود سبور//

ما حدها كتقاقي فاتحاد طنجة وهي كتزيد تبيض، والوضعية المالية ديال الفريق كتغرق، وتصدم تاني بمنع الجماهير من حضور ديربي الشمال ضد المغرب التطواني، اللي كان معول عليه يدخل منو شي عائدات مالية يعاون بها.

وتقرر الماتش بين اتحاد طنجة والمغرب التطواني ضمن الدورة 10 من البطولة الاحترافية، يتلعب يوم الأحد 26 نونبر 2023 على الساعة الرابعة عصرا بملعب البشير بمدينة المحمدية بدون جمهور.

ورفضت السلطات ديال المحمدية تمنح ترخيص لإدارة اتحاد طنجة لاستضافة الماتش فتيران البشير بحضور الجماهير، وأكد عليها بلي الماتش غيتلعب ويكلو بلا جمهور لدواع أمنية.

ومطالبين طنجة برئاسة محمد الشرقاوي يلقاو حلول للوضعية ديال الفريق ويقلبو على مداخيل مالية اخرى من غير عائدات الجماهير، خصوصا وان الفريق مدة هادي وهو كيلعب خارج تيران طنجة اللي كيتصلح، مع العلم أن اللاعبين د الفريق فكل مرة كيديرو إضراب باش يطالبو بمستحقاتهم.