محمد سقراط-كود//

محامي تعرضو ليه عصابة گريساوه فاش جاو البوليس هزوه هو وصوروه وعمرو ليه محضر وسيفطوه للحبس وخرج الفيديو علما أنه ضحية ديال الكريساج، واش كان سكران او مقرقب او واكل المعجون هادشي ثانوي الأهم هو عندنا مواطن ضحية للكريساج وسط مراكش وفاش جاو البوليس صدقوا مصورينو وكيتمرگنو بيه ومسيفطينوزللحبس والفيديو تسرب، راه الشتازي ديال ألمانيا الشرقية ومايديروهاش، السيد سكران وتعرضات ليه عصابة كريساوه وسلخوه راه عادي يكون كاعي ويربب ويسب ويعاير، علاش يتصور أصلا ويخرج الفيديو لي ربما دار عكس المبتغى منه، راه الناس تعاطفوا مع المحامي خصوصا لي مجربين الشراب وعارفين بلي في ساعة الغضب وبنادم سكران يقدر يسب كاع المقدسات حتى واليديه.

بزاف ديال المغاربة علاقتهم مع البوليس تحسنات بزاف في عهد الحموشي، وبصح الجهاز تطور وتقدم والناس ديالو محترمين ومأدبين، ومابقاتش الكوميسارية بلاصة لي كتخلع بحال شحال هادي، بل ولات إدارة مواطنة كتستقبل المواطن بابتسامة وتعاملوا بكل احترام، وكاين حتى شعور عام أنه في عهد الحموشي إلى ظلمك بوليسي غادي تاخذ حقك منو كذلك إلى تطاول مواطن على بوليسي غادي ياخذ البوليسي حقو، كاين دمقرطة ومساواة في علاقة البوليس بالمواطنين وهادشي كيريح بزاف، رجل الشرطة الإنسان المحترم الملاذ الآمن للمواطنين ورمز وقدوة للتامغرابيت بكل ماتعنيه الكلمة هادشي كنعيشوه في عهد الحموشي، ولكن للأسف ضروري مرة مرة كتخرج شي سلوكات من جنب.

وعلاش حتى يتابع المحامي في حالة اعتقال مالو شنو دار، بالإضافة إلى أنه من المفروض ضحية لاعتداء جسدي وسرقة موصوفة، والسيد مشا هكاك دوز يوماين في الكوميسارية وسيفطوه للحبس، كأنه مجرم عندو سوابق او معندو حتى ضمانات ديال الحضور، راه محامي زعمة عندو كاع ضمانات الحضور ويتابع في حالة سراح، ويمشي لدارو عند وليداتو ويتلقى العلاج الطبي والعلاج النفسي من الصدمة ديال الكريساج والعنف المجاني لي تمارس عليه، عوض يوقع هادشي بحال في أي دولة تحترم نفسها صوروه وتسرب الفيديو، عوض نشوفو النيابة العامة كتحقق في شكون سرب الفيديو وعلاش تحط في مواقع التواصل وشكون حطو؟ راه هادشي لي خاص يكون ماشي شنو لي كان.