بني ملال – كود//
توصل المحامي صبري الحو اليوم بتقرير تشريح جثة الطفل محمد بويسلخن اللي وصل لمحكمة الاستئناف بالراشيدية ،المحامي قال: “مشيت للسبيطار ابن رشد باش نوقف على الوسائل التقنية المستعملة فالتشريح وعلى الدرجة العلمية ديال التقرير، باش نضمنوا أن كلشي قانوني وموثوق”. صبري قال باللي: “ما كايناش أي حاجة كدل على ان موحمادينو قتل راسو أو انتحر ، عكس التشريح لولاني لي رجح هاد الفرضية .
المحامي زاد وقال: “الطريق مازال طويلة وغادي نبقاو متابعين القضية حتى تبان الحقيقة كاملة”، ووضح أن تم الاحتفاظ بضفران ديال الطفل وشعرو باش تكمل الأبحاث الجنائية، التقرير فيه استنتاجات أولية، ولكن ما يمكنش إعطاء حكم نهائي فهاد المرحلة.
من جهة أخرى، لجنة الحقيقة والمساءلة قررتت تأجيل الوقفة الاحتجاجية اللي كانت غادار هاد السيمانة قدام مركز الدرك الملكي فبومية، وقالوا: “القرار جا بسبب سوء الأحوال الجوية والنشرة الإنذارية .
الناشط الحقوقي قاشا أكد: “اللجنة غادي تركز على متابعة الملف حتى تبان جميع الملابسات، والقضية ما غاديش تتوقف حتى توضاح الصورة ” وضاف كنأكدوا أن كلشي تحت المراقبة باش يتم احترام حقوق الطفل وعائلتو و التأكد من أن العدالة توصل لنتيجة واضحة”.
