كود كازا//

تواصل الفرقة غرفة الجنايات الابتدائية بمحكمة الاستئناف بالدار البيضاء وبالضبط القاعة 8، الاستماع لسعيد الناصيري الرئيس الأسبق للوداد الرياضي والقيادي السابق بحزب الأصالة والمعاصرة، فالاتهامات الموجهة له من طرف الحاج احمد بنبراهيم الملقب بالمالي فقضية ما يعرف بـ “أسكوبار الصحرا”، وخلال جلسة اليوم الجمعة وقف الناصيري قدام هيئة المحكمة وهو لابس تيشورط فالموف وسروال كحل وكان محسن كيف ديما وأنيق، وكايدير النضاضر ديالو ملي كايبغي يقرا شي وثيقة باش يدافع على راسو وينفي الاتهمات الموجهة له.

https://www.facebook.com/share/v/1AJq4yE9if/?mibextid=wwXIfr

وبخصوص أطوار المحاكمة، هضر المحامي امبارك المسكيني عن هيئة دفاع سعيد الناصيري، وقال فتصريح لميكرو جورنال “گود”: “هاد الوقائع كلها اللي قال المالي، وقفنا فيها على واقعة واقعة وما لقيناش ولا واقعة واحدة صحيحة، تخيلو معنا اليوم كانتواجهو بهذاك التصريح ديال وسام نادر، وهاد وسام نادي كان جا واحد الشاهد صرح بالتصريح ديالو امام الفرقة الوطنية وقالهم راه كاين واحد السيد سميتو وسام نادر وغاندوزو لكم فالتيليفون وسمعو له فالتيليفون، وسعيد الناصيري كايقولهم ان المعلومات اللي عندي هي ان وسام نادر الحقيقي ميت، والى كان حي يجي يواجهني.”

وكمل محامي الناصيري وقال: “هاد وسام نادر كايقول بلي صيفط تواصل ديال الما والضو لسعيد الناصيري، على اساس ان الماگانا ديال الما والضو د الفيلا كانت باسم المالي، واليوم ليديك الشركة المكلفة فهاداك الوقت بتزويد الما والضو كاتقول ان هذا الشي كذوب وما عمر الحاج أحمد بنبراهيم يتوفر على الرباط ديال الماء والكهرباء فهاد الفيلا، وشهدت بكثر من هذا ففالوقت اللي كايدّعيو هاد الناس ان هاد الفيلا كانت ماخور ومرتع للفساد راه ما كان فيها لا ما لا ضو، فهاد الناس اللي كبار وكانو كايجيو يقصرو تما ما عرت واش كانوا كايجيو يقصرو بالشمع ولا كانو دايرين اللامبا ولا كانو كايقصرو بالغاز ولا حافرين شي بير كايعومو به تما، هادي راه أمور بسيطة ولكن هي أمور مهمة، لهذا حنا المغاربة ما يمكنش يجي شي واحد يقول لينا اي كلام وندوزوه، راه عندنا الغربال، والغربال اللي عندنا راه غربال شطاطو وغربال شطاطو ما كايدوزش اي حاجة”.

للإشراة فهيئة المحكمة قررت تأخير جلسة الاستماع لسعيد الناصيري والمتابعين معه فقضية ما يعرف بـ “إسكوبار الصحرا”، حتى الجمعة الجايا لموافقة لـ16 ماي 2025.