عمر المزين – كود///

راجع المهرجان الدولي للرحّل فالدورة 21 ديالو من 3 حتى لـ5 أبريل 2026 فواحة محاميد الغزلان، على باب الصحراء المغربية. هاد التظاهرة اللي بدات فـ2004 ولات موعد ثقافي مهم كيجمع بين تراث الرحّل والفن المعاصر.

هاد السنة، حسب بلاغ للمنظمين، البرنامج غادي يكون مميز بمشاركة فنانين من المغرب وإفريقيا وأوروبا، بحال دان غاريبيان، ومجموعات تومستين وتارتِيت، وزيد عليهم فيرجيني ديمبيلي وإبراهيم لغفيري، اللي غادي ينشطو ليالي الصحراء بالموسيقى.

المهرجان ماشي غير حفلات، بل تجربة متكاملة فيها عروض، سباق الهجن، هوكي الرمال، الصقارة، ومعارض للصناعة التقليدية، وتذوق المأكولات الصحراوية بحال “الملا” مع أتاي.

وزيد على هادشي، كين “منتدى الرحّل” اللي غادي يناقش قضايا الحياة فالمناطق الصحراوية. المهرجان كيبقى فضاء للتلاقي، الإبداع، ودعم التنمية الثقافية والسياحية فالمنطقة.