كود -مراكش//

المحكمة الابتدائية بمراكش حكمات اليوم الاثنين 17 غشت، بإدانة المؤثرة سكينة كلمور بـ10 شهور ديال الحبس، مع غرامة مالية ديال 500 درهم، على خلفية متابعتها بتهمة الإخلال العلني بالحياء العام.

الحكم تضمن حتى قرار كيمنع سكينة كلمور من استعمال مواقع التواصل الاجتماعي  لمدة 3 سنين، كعقوبة إضافية مرتبطة بالملف.

هاد القرار كيعني أنها غادي تكون ممنوعة طول هاد المدة من مختلف أشكال الظهور والتواصل من منصات التواصل الاجتماعي، وبالتالي غادي يتقيد الحضور الرقمي ديالها لمدة 3 سنين.

وكانت النيابة العامة بالمحكمة الابتدائية بمراكش قررات،السبت اللي فات 15 غشت، متابعة سكينة كلمور فحالة اعتقال، مع تحديد اليوم الاثنين لانطلاق أولى جلسات محاكمتها.

هاد المتابعة جات على خلفية بث مباشر بانت فيه أجزاء حساسة من جسمها مني كانت كتروج لملابس داخلية،  الشي اللي دفع المصالح الأمنية تفتح بحث قضائي تحت إشراف النيابة العامة المختصة.