كود -كازا //

مجموعة ستاندرد تشارترد البريطانية دارت الافتتاح الرسمي للمكتب التمثيلي ديالها لبارح الخميس 4 ديسمبر فالمغرب بعدما خذات الترخيصات اللازمة من بنك المغرب المركزي وسلطة مدينة الدار البيضاء للمالية (Casablanca Finance City Authority). هاد الخطوة جاية باش تعزز الحضور ديال البنك فالسوق المغربية والإقليمية وتقوي الشراكات مع الزبناء المحليين والدوليين.

المكتب غادي تسيرو سينثيا إل أسمر، المديرة العامة ورئيسة المكتب فالمغرب، وغادي يركز على دعم الزبناء فمجالات بحال السيارات، الطاقة المتجددة، الطيران، والصناعات الغذائية، رولا أبو منه، الرئيسة التنفيذية ديال البنك فالشرق الأوسط والإمارات وباكستان، أكدات الالتزام ديال ستاندرد تشارترد بالمغرب وقالت باللي البنك غادي يدعم طموحات النمو فالبلاد، وشكرات بنك المغرب وسلطة مدينة الدار البيضاء للمالية على الدعم ديالهم طوال العملية.

من جهتو، سعيد إبراهيمي، الرئيس التنفيذي ديال سلطة مدينة الدار البيضاء للمالية، صرح أن افتتاح المكتب كيعزز النظام المالي المغربي وكيأكّد على الدور الاستراتيجي ديال المغرب كمركز للوصول لأسواق إفريقيا والشرق الأوسط، هاد الخطوة كتبين أن ستاندرد تشارترد غادي تولي لاعب مهم فتعزيز الاستثمارات وتسهيل التمويل الهيكلي، وكتأكد الطموح ديالها لدعم التنمية الاقتصادية المستدامة فالمنطقة.