احمد الطيب كود الرباط//

مجلس وزاري مرتقب يكون هاد الاسبوع. توقعات كتقول الخميس، طبعا تفاصيل والبرنامج متسرب والو، كولشي كيتسنا شنو غايكون قبل وبعد هاد المجلس الوزاري الهام.

توقيت انعقاد المجلس جاء مع سياق الفضيحة الكبيرة للي كشفاتها الصحافة الاسترالية “ذو اوستراليان” وقبلها الصحافة الانگليزية “دايلي ميل” حول شبهة تضارب مصالح بين وزيرة الانتقال الطاقي البامية ليلى بنعلي والملايري الاسترالي اندرو فورست. هاد الزلزال كولشي كيهضر عليه فالمغرب خصوصا مور التصريح ديال الوزيرة بنعلي ل”گود” كتقول فيه بلي كتعرض لاستهدافات.

قضية ليلى بنعلي، مقلقة قيادة البام والحكومة، ومصادر “گود” كشفات بلي قيادة البام عطات مهلة 24 من البارح باش يتم توضيح هاد القضية، يعني اليوم مرتقب البام يصدر بيان او تصريح حول الموضوع.

هاد القضية خلقات رجة سياسية ورئيس الحكومة مطالب بتدبيرها بالسرعة والحكمة اللازمة، وإذا أمكن فيجب الإسراع بتغليفها بتعديل حكومي. حسب مصادر حزبية هضرات مع “گود”.

دبا كاينا مشاورات مكثفة في أمر تطويق قصة “ليلى والذئب الأسترالي”. ربما التعديل الحكومي سيكون أسرع مما يتصور.

يلا كانت شي قضية خصها الشفافية والجرأة هي هادي ديال بنعلي. شبهة تضارب مصالح كبير. فين الاخلاق العالية والمبادئ الصادقة. وفينك يا المنصوري ومكتبك السياسي وفين يا الحكومة.

القضية ما عندها علاقة ببوسة. حتى صحافة الپيبل البريطانية والاسترالية ركزات على تضارب المصالح.

فالمغرب كذلك، المغاربة ركزو فالسوشل ميديا وفالاعلام على هاد تضارب المصالح. على نقطة وحدة، واش الوزيرة بهاد الصفة لعبات دور باش هاد الملايري الاسترالي خدا صفقات فالمغرب. واش عطاتو معطيات سرية ووثائق غير مسموح بالاطلاع عليها باش ياخد المارشيات فبلادنا.