بني ملال – كود//
مجلس جهة بني ملال-خنيفرة صيفط رسالة رسمية للمدير العام ديال شركة الطيران الأوروبية رايان إير، كيقترح فيها فتح خط جوي مباشر بين مطار بني ملال ومدينة أليكانتي الإسبانية، بعد النجاح الكبير لي عرفوه الرحلات المباشرة اللي تفتحات مؤخراً نحو برشلونة وميلانو.
فهاد الرسالة لي مضروبة بتوقيع رئيس المجلس، قالو باللي الإقبال الكبير على الخطوط الجديدة كيبين ماشي غير صحة القرار الاستراتيجي ديال الشركة، ولكن حتى الارتباط الكبير ديال الجالية المغربية، لي جاو من جهة بني ملال-خنيفرة، بوطنهم الأم.
وذكر المجلس باللي كاين طلب متزايد من أفراد الجالية المغربية المقيمة برا، خصوصاً لي ساكنين فمقاطعة أليكانتي فإسبانيا، لي كتمثل وحدة من المناطق الأوروبية لي كيجيو ليها بزاف ديال الناس من هاد الجهة. وهادشي كيجعل من الضروري فتح خط مباشر ومنتظم وبثمن مناسب بين بني ملال وأليكانتي.
المجلس أكد باللي هو مستعد يواكب هاد المشروع ويعبّي مختلف الشركاء والموارد باش يضمن استمرارية الخط وربحيته، وكيشوف باللي هاد الخط غادي يسهل تنقلات الجالية المغربية، يقوي الروابط العائلية والثقافية، يشجع التنمية الاقتصادية والسياحية فالجهة، ويعزز موقع رايان إير كشريك مميز فربط المغرب بالعالم.
والمجلس عبر حتى على قناعته باللي فتح هاد الخط الجديد غادي يكون نجاح مشترك ورافعة استراتيجية باش الجهة تدخل أكثر فشبكات النقل الجوي الدولية، وأعلن باللي هو مستعد يدير اجتماع مع مسؤولي الشركة باش يناقشو التفاصيل والإجراءات باش ينجح هاد المشروع الكبير.
