وكالات//

تباعت كمانجة كانت ديال العالم ألبرت آينشتاين بـ860 ألف جنيه إسترليني فدار المزادات Dominic Winter Auctioneers فمدينة ساوث سيرني، فمقاطعة غلوسترشير فبريطانيا، وتجاوز التقديرات الأولية اللي كانت 300 ألف جنيه. ومع العمولة ديال المشتري اللي هي 26.4%، الثمن الإجمالي ولى كثر من مليون جنيه إسترليني، وهذا كيخليه من أغلى الأثمان اللي تخلصات على كمان ماعزفش عليه محترف أو ما تصنعش عند ستراديفاريوس.

الكمانجة اللي صنعها الحرفي زونترر فـ1894، كيتقال عليها أنها أول آلة عَزف عليها آينشتاين. عملية البيع دامت حوالي عشر دقايق فقط، وكانو تلاتة مزايدين كيشاركوا عبر التليفون. كبير خبراء المزادات كريس ألبوري وصف هاد اللحظة بأنها “لحظة مميزة”، وقال بلي كاين اهتمام كبير بالمقتنيات الشخصية ديال آينشتاين. حتى كتاب فالفلسفة أهداه آينشتاين لصاحبو تْباع بـ2200 جنيه إسترليني، بينما المقعد ديال الدراجة اللي كان عنده ما تْباعش وممكن يخرج فمزاد آخر.

آينشتاين، المعروف بثورته فالفيزياء، كان عاشق للموسيقى وهاوي؛ بدا يتعلم العزف على الكمان وهو عندو 4 سنين وكمل يعزف طول حياتو، وكان ديما كيقول لو ماكانش عالم كان بغى يكون موسيقي.

آينشتاين عطى هاد الكمان، ومعاه مقتنيات أخرى، لصاحبو الفيزيائي ماكس فون لاو عام 1932، قبل ما يمشي لأمريكا هربًا من النازية ومعاداة السامية ف ألمانيا. من بعد 20 عام، ماكس فون لاو عطا هاد المقتنيات لمارجاريته هومريش، وحدة من المعجبات ديال آينشتاين، وحفيدة مارجاريته عرضاتهم فالمزاد مؤخراً.