كود – مراكش //

شدّات عناصر الأمن التابعة للدائرة الأمنية الثالثة فمدينة مراكش واحد السيد كان منتحل صفة مرشد سياحي، من بعد ما تعدى على سائح أجنبي وطرشو وسط المدينة العتيقة.

https://vt.tiktok.com/ZSX47fY8V/

القضية بدات من بعد ما انتاشر فيديو ديال السائح، اللي عاود بلي كان كيدور فالمدينة القديمة مع واحد صاحبو، قبل ما يجي عندهم فوكيد ويعرض عليه يورّيهم الطريق، ومن بعد مداهم لشي بلايص حدا دار دباغ معجباتهمش، طلب منهم يخلصوه بـ1000 درهم كمقابل لـ10 دقايق ديال دوران.

السائح رفض يعطيه هاد الفلوس، وقاليه نعطيك غير 100 درهم، قبل ما يصمكو المشتبه فيه، الشي اللي خلا الفيديو ديال القصة لي كيعاود السائح ينتاشر ويتفاعل معاه بزاف ديال الناس فمواقع التواصل الاجتماعي.

وبعد الأبحاث والتحريات، قدرات مصالح الأمن تجبد مول الفعلة وتشدو وتبحث معه تحت إشراف النيابة العامة المختصة، باش يتحددو جميع ظروف وملابسات هاد القضية.

ومن جهتو، أكد السائح بلي هاد التصرف ما كيمثلش المغاربة، واعتبرو سلوك فردي، كما شكر المغاربة على حسن الاستقبال والضيافة اللي لقاها طول مدة إقامتو فالمغرب.