كود – الرباط //

صادقات اللجنة الحكومية لحفظ التراث غير المادي ديال منظمة اليونيسكو، اليوم الأربعاء فالهند، على الملف لي حطاتو المملكة المغربية باش يتسجل القفطان المغربي كتراث عالمي.

هاد الاعتراف الدولي كيجي تتويج للجهود ديال المغرب بقيادة سيدنا، لي كيعيطي اهتمام كبير للثقافة المغربية وحفظ التراث ديال البلاد.

المغرب قدم ملف كامل فيه كاع العناصر لي كتبين غنى وتطور التراث المرتابط بالقفطان، وراقبات هاد الملف وزارة الشباب والثقافة والتواصل، والمندوبية الدائمة للمغرب فاليونيسكو فباريس.

القفطان المغربي ماشي غير لباس، ولكن رمز حي للهوية المغربية، كيتنقل من الأم لبنتها، ومن المعلم للمتعلم كثر من ثمنية قرون، وكيمثل تراث تقني وجمالي متميز، كيحتافل بيه العالم كامل.

الملف تصايب بدقة كبيرة، كيشرح الحرف والمهارات، والوظائف الاجتماعية، والمجتمعات لي كتحافظ على هاد التقليد، بطريقة شاملة وبلا أي تسييس.

بهاد الاعتراف الدولي، وزارة الشباب والثقافة والتواصل كتشكر جميع الحرفيين والصناع التقليديين المغاربة على مجهوداتهم الكبيرة،  والمجتمع المدني وسط وبرا المغرب لي كيحافظ على التراث الثقافي المغربي، وجميع الناس لي شاركوا فهاد الملف.