كود سبور//

قدر النجم الفرنسي كيليان مبابي يماركي لريال مدريد فبطولة الصبليون بعدما صام على التسجيل فالجولات الثلاث الأولى، وماركا اليوم الأحد على ريال بيتيس برسم الجولة الرابعة من لاليگا.

وسالا ماتش ريال مدريد وريال بيتيس فتيران سانتياگو بيرنابيو بنتيجة 2 لزيرو لمصلحة كيليان مبابي وصحابو، وماركاهم كيليان مبابي بجوج، وسجل الهدف الأول فالدقيقة 66، بعد أسيست ديال فالفيردي، والهدف الثاني ماركاه فالدقيقة 74 من بيلانتي.

وللإشارة فالماتش بين ريال مدريد وبيتيس عرف مشاركة المغربي ابراهيم دياز من جانب ريال مدريد كاحتياطي ودخل لعب فالدقيقة 65، والمغربي الاخر عبد الصمد الزلزولي اللي لعب رسمي مع ريال بيتيس وخرج فالدقيقة 83.

وبهذه النتيجة خداو ريال مدريد 3 نقاط وطلعو للمركز الثاني برصيد 8 النقاط، ورا البارصا المتصدرين بـ12 نقطة، أما ريال بيتيس بقات عندهم 2 نقاط ومحتلين المركز 17.