گود سبور//

كاينة شكوك واش يقدر يكون الدولي المغربي نصير مزراوي، حاضر مع المنتخب الوطني المغربي فالماتشات ديالو الجوج الجايين ضد كل من النيجر وزامبيا خلال التوقف الدولي المقبل ضمن إقصائيات كاس العالم 2026 فالسيمانا الاولى من شتنبر المقبل، والفريق ديالو مانشستر يونايتد النگليزي ما عارفينوش واش غايكون واجد قبل هذا التوقف الدولي ولا لا.

وهضر البرتغالي روبن اموريم مدرب مانشستر يونايتد، خلال لقاء مع الصحافة، نشروه موقع النادي النگليزي، وجاوبهم ملي سولوه على نصير مزراوي واش غايكون فالماتشات الجايين بجوج ديال الفريق قبل التوقف الدولي وقال: “لا، يقدر يكون السيمانا الجايا، غانشوفو”.

وطمن مدرب مانشستر يونايتد، الجمهور على الحالة ديال نصير مزراوي، وقال: “ولكن راه قريب يرجع، ودابا كانساليو معه شي تداريب، باش نتأكدو بلي ما ما عندو حتى شي مشكل آخر”.

وكايغيب نصير مزراوي على مانشستر يونايتد من نهاية الموسم الماضي بسبب الاصابة، وهي الاصابة اللي خلاتو يغيب حتى على المنتخب الوطني المغربي خلال التوقف الدولي في شهر يونيو الماضي.