الرئيسية > آش واقع > ما عندو زهر حتى فالموت. شخص غرق بطونوبيلتو فزبل مديونة
16/01/2020 08:52 آش واقع

ما عندو زهر حتى فالموت. شخص غرق بطونوبيلتو فزبل مديونة

ما عندو زهر حتى فالموت.  شخص غرق بطونوبيلتو فزبل مديونة

عفراء علوي محمدي- كود//

حادث خطير وبشع فاقت عليه، لبارح فالصباح بكري، ساكنة منطقة الحلابية التابعة لجماعة مديونة، وخلق حالة من الرعب في النفوس، حيث تم العثور على جثة شخص متوفي غرقا وسط سيارتو للي هي من نوع “داسيا”، بعد ما زلقات ليه فمستنقع للمياه العادمة للي كايشمل عصارة نفايات المزبلة اللي كايتواجد بالمنطقة.

وهذي ماشي أول مرة كايوقع حادث بحال هذا، حيث كانت مجموعة من الحافلات والسيارات تعرضات للغرق فنفس المستنقع، آخرها سيارة من نوع “بوجو 206″، وللي غرقات فشهر يونيو اللي فات، وهاتشي دون تسجيل أي حالة وفاة.

الحوادث الكثيرة للي كتوقع جات كنتيجة لقرب المستنقع من مقطع طرقي كيسهل حركة السير، وكايتعتبر مسلك مختصر كايدوزو منو بالزاف ديال الناس، لذلك كانت الساكنة استنكرت وجودو، وطالبت المجلس الجماعي ديال كازا، بتوسط جمعيات المجتمع المدني، باش يلقاو حل سريع لهذ المشكل، قبل ما توقع شي حادثة مميتة.

موضوعات أخرى

18/01/2020 20:30

إمام جامع وصف اللي كايخلي مراتو تسافر بالديوث.. وحاجي لـ”كود”: “النيابة العامة خاصها تحرك مساطر المتابعة ضدو وهادشي عمرو كان فالإسلام”