طنجة كود ///

في الوقت للي الشك بدا يدخل طنجاوا بخصوص واش المدينة غادية تكون واجدة تبقى ضمن المدن لتنظيم كأس إفريقيا 2025، بسبب تأخر الأشغال في الملعب والمشاريع المرتبطة بتأهيل المدينة للحدث الكروي، السي الوالي يونس التازي هز صيكانو هو وعائلتو ومشى يستمتعو بأجواء الجنوب الإسباني.

مصادر “كود” قالت باللي التازي غادر طنجة البارح السبت فالصباح وقصد ماربيا الإسبانية، فرحلة بحرية من ميناء طنجة المدينة لميناء طريفة، وكمل بطونوبيلتو الشخصية.

هاذشي كان غادي يكون عادي، لو أن كلشي على ما يرام في مدينة طنجة اللي هي ضمن المدن الستة المعنية باستقبال مباريات كان 2025.. لكن الوقائع على الأرض كتقول باللي القضية حامضة، خصوصا أن فوزي لقجع، رئيس الجامعة الملكية المغربية لكرة القدم، كان عطى شهرين كأجل لانتهاء الأشغال وجاهزية ملعب طنجة.. هاذشي كان في يناير يعني الأاشغال حسب مهلة لقجع كان خاص تسالي في لاخر ديال مارس، ودبا ماي هاهو على الأبواب وباقي ما كاين والو.

أكثر من ذلك كانت لجنة ديال “الكاف” جات مؤخرا لطنجة وزارت المشاريع المعنية بالكان وعطاتهم شهرين كأجل، يعني من هنا لشهر يونيو.

مصادر مطلعة على سير الأشغال بالمدينة كتقول بلي هاد الشي ممكن ايلى كلشي تعبا ليل ونهار.

هاد لشي كيبان فمدن عندها الكان بحال الرباط وكازا ومراكش وفاس واكادير. ولاة هاد المدن وافقين على الشادة والفادة. طنجة دابا غادية بريتم يقدر يخلع. خاصها راس جديد يتحرك مزيان وبزاف