حكيمة لعروسي كود ////

ماكنتش باغا نكتب على الانتخابات و لكن تراجعت على قراري وقلت نشارك معاكم رأيي .

في الصراحة تصدمت وبزاااف خصوصا من عزوف المغاربة على التصويت والمشاركة ،حيث أن الاحصائيات تقول أن المصوتين اللي قررو مصير كل المغاربة هم فقط 6 مليون ، و العازفين عن التصويت قدرو ب 20 مليون مغربي وأسباب المقاطعة تختلف كاين اللي تايقول لن اشارك في هذه المهزلة ، كاين اللي تايقول ها احنا صوتنا أشنو غادي يتبدل ؟ …ولكن اشنو درتي باش ما تكونش مهزلة ولا باش يحدث تغيير ؟؟ باب الترشيح مفتوح وإيلا شفتي راسك قادر تنفع الناس بأفكارك ترشح ، الموهيم أنا ماغاديش نتدخل في الناس لان عندي قناعة بالحرية الفردية وعارفة بزاف الناس صوتو قبل بحماس وماشافو والو تغير ، ولكن التغيير راه ممكن يجي بالتدريج لان ماشي جميع السياسيين فاسدين او كلهم باغين مناصب فقط من أجل المال ، كاينين ناس وطنيين وباغين الخير لهاد البلاد لهذا كتبت بوست في فايسبوك دعيت فيه الناس للتصويت وللمشاركة بكثافة .

اللي خلاني نكتب هاد السطور هو أني بغيت نقول للناس أنا معاكم في اننا كلنا تانقولو لا نثق الا في سيدنا جلالة الملك، الضامن للديمقراطية ولاستمرار المؤسسات، وقياس الديموقراطية في البلدان كايتعرف بنسبةالمصوتين و المشاركين في الانتخابات .

وبغيت نقوليكم مع احترامي لحريات الناس اللي رفضو يصوتو ولكن كنشوف هاد التصرف فيه غباء، ماشي تانقول هوما أغبياء لا كنعاود نكرر هاد التصرف فيه غباء كانتاقد الفعل ماشي الناس .

وكانتمنى من المسؤولين اصلاح التعليم ثم التعليم ثم التعليم قبل كل شيء باش نلقاو شباب فاهم معنى الديموقراطية وفاهم اهمية التصويت وقادر يشارك في الحياة السياسية عن وعي و فهم لما يدور حوله .

كلنا بغينا بلادنا تكون احسن بلاد ، و لكن تاواحد ماباغي يدير واجباتو على أكمل وجه ، إذن غادي نبقاو ندورو في حلقة مغلقة اللي نقولوه نعاودوه … هاد البلاد ماغادي تتقدم الا بشباب واعي خايف على بلادو و مقدر خطورة التطرف في الدين و الاطماع الخارجية ، وراه كلامي موجه للجميع المقاطعة ليست حل بغيتو تطالبو الدولة بشي حاجة ديرو واجباتكم وطالبو بحقوقكم و لكن باش تخليو 6 مليون مغربي يحددو مصير اكثر من 30 مليون مغربي لا لا لا….

ومن هنا أهنئ حزب العدالة والتنمية على الفوز بالانتخابات بالبيكيني الازرق لأن اللون ديال المصباح ازرق و السلام ختام .
كلامي للكبار فهما لا الكبار سنا
الله يجيب اللي يفهمنا و لا يعطيناش