كود سبور//

نايضة كلاشات بين الرجا والوداد الرياضيين، قبل الديربي اللي غايتلعب اليوم الجمعة مع 6 العشية بتيران العربي الزاولي برسم الدورة 11 من البطولة الاحترافية، وما خلاو للجمهور اللي غايب على المباراة ما يقول.

صفحات الوداد الرياضي على مواقع التواصل الاجتماعي، حطات تيفو سابق لجمهور الفريق كانو طلعو فديربي المعروف بالريمونتادا، فيه “بيتشو گالس على الكورة ومكتوب عليها طال الانتظار” زعما ما يدعيه الوداديون أن الرجا ما كملوش ميطا مع فريقهم فواحد الديربي فالسبعينات.

وردو عليهم الرجاء الرياضي بصورة حطوها على مواقع التواصل الاجتماعي، فيها تيفو لديربي الريمونتادا فيه صورة صلاح الدين بصير ويوسف سفري وجمال السلامي، دايرين بيديهم 5 لواحد”، وهي إشارة منهم لنتيجة الديربي اللي ربحوه الرجا فالتسعينات بخمسة لواحد.

الكلاشات بقى مستمرة بين الغريمين، والرجاء الرياضي نشرو صورة لتوقيت الديربي، بعدد من الدول فالعالم، وفبلاصة كازا بلانكا، دارو مدينة المحمدية، زعما على هشام آيت منا رئيس الوداد اللي هو من مدينة المحمدية وماشي من كازا وكان رئيس لشباب المحمدية قبل ما يولي رئيس الوداد.

الوداد الرياضي حتى هما جاوبو الرجاويين ونشرو توقيت الماتش بعدد من مدن العالم، ودارو هامبورگ الألمانية، زعما راه الرئيس السابق للرجا موقوف فالمدينة الألمانية المذكورة، بسبب مذكرة البحث الصادرة فحقو.

المشكل ديال هاد السلوكات الصادرة من الأندية، هي أنها ممكن تحضر شي مشجعين على ارتكاب الشغب، ومن بينهم القاصرين المتعصبين للفريقين، خصوصا وأن الماتش ملعوب بلا جمهور وهذا الشي يقدر يحول هذه الكلاشات من مواقع التواصل الاجتماعي للقهاوي والشوارع.