الرئيسية > آراء > ما خاصناش ننساو باللي كرانس مونتانا اكبر المستفيدين منو ماشي اولاد التراب وباللي اوعشي غادية وتربح منو
14/03/2019 10:58 آراء

ما خاصناش ننساو باللي كرانس مونتانا اكبر المستفيدين منو ماشي اولاد التراب وباللي اوعشي غادية وتربح منو

ما خاصناش ننساو باللي كرانس مونتانا اكبر المستفيدين منو ماشي اولاد التراب وباللي اوعشي غادية وتربح منو

كود علي الصافي الداخلة ///

فضايح سبق لينا قلناها وغاديين نكرروها كل دورة من دورات كرانس مونتانا. هاد العام الدورة الخامسة. مهم بزاف تكون فالداخلة. مهم تولي فضاء دولي للنقاش والتفكير. مهم تكون افريقيا فصلب اهتماماتو. مهم تفقص البوليساريو وتفقص ليهم المرارة بهاد التنظيم.

دورة هاد السنة غادية تكون مزيرة الصمطة. المشكلة لكبيرة فهاد الملتقى هو وجود وحدين طالعين واكلين نازلين واكلين وماشي ولاد الداخلة ولا ولاد لعيون وما عمرك تشوفهم كيدافعو على الصحرا دوليا لسبب بسيط ما عارفين والو فالقضية وما عندهم حتى شرعية.

كاينين شي وحدين مستافدين بزاف كيتخلصو على خدمة ما كيديروهاش. الخدمة لكبيرة كيديرها الامن وكيتعدب فيها. كيديرونا بروتوكول وزارة الخارجية وكيستخسخ فيها. كيديرونا ناس الداخلية وكيعياو فيها. هادوك الوكالات والشركات اللي كياخدو المارشيات بلا مقاصة بلا والو هما الرابح الاكبر فهاد القضية. فضيحة كبيرة وصافي.

كاينين مالين الشاطو مالين كراء الطونوبيلات … وكاينة ليلى اوعشي اللي ما دارت والو فحياتها من غير خدمات مع جطو باش كان وزير اول ومن ديك النهار وكثروتها كتزاد.

السيدة واخدة مارشي كبير ديال التواصل والعلاقات مع الصحافة بلا ما دير والو. والو والو حتى اللي تفراق البادج ما كديروش. لا علاقة لا تواصل. فلوس باردين. لفضيحة كيفاش تاخد مارشي بحال هادا وما كيطلبوش منها وثيقة من الضمان الاجتماعي نعرفو شحال من واحد كتخلص عليهم الضمان الاجتماعي. كتجيب غير متعاونين لهاد الحدث. هادي اهانة للصحرا كلها.
طبعا ما كاين حتى حد من المنطقة كيستافد.

عندها اوطيل يالله فتحاتو فالداخلة. كيفاش ولات مالكة للفنادق هادي قصة اخرى واهانة لناس الصحرا.

هاد الشي هو اللي مهم ماشي اش غادي يوقع من اليوم حتى 17 من هاد الشهر. شعار “بناء قارة إفريقية قوية وحديثة في خدمة الشباب” غير تخربيق امام ممارسات بحال امثال ليلى اوعشي.

نهار الامور تبدل غادي يولي اشعاع كرانس مونتانا قوي بزاف.

موضوعات أخرى