حكيمة لعروسي كود /////

كالعادة فقت في الصباح هزيت البشكليط الزرقا ديالي و بديت ندور في الفايسبوك نقلب على شي خبيرة ونصدق الكومنتات واللايكات ، وبالمرة إيلا لقيت شي جوج مناكرين على شي بوست ندخل بيناتهم بخيط ليموني ونخليها شاعلة ونزيد عزيز عليا ندير الحسنات .

لقيت ها اللي حاط فيديو شابع معيار في الانتخابات هاللي غير ساير داوي خاوي المهم الفايسبوك نايض هاد ليامات تاللي لا علاقة ليه بالسياسة كايتسايس مع الناس ، المهم دخلت لصفحة صديقي السيناريست عماد الغندور ولقيتو كاتب (( يالله جيت باغي ندخل عليه كاس نتاع الما لقيت مول لامانة دا امانتو …….مشا سقراط)) وانا نقول اهيا ناري اميميتي سقراط الصكع تسينيالا ، أناري فين نصد و لمن نشكي زميلي الضريف اللي كيطلعها على كولشي حتى على راسو غدرو بيه العديان حطيت البشكليط و بديت نجري في الدار ونعدد واهيا ناري ما تجي غير في الضريفين وعدمي وكلامك على مزيناتو و باقي صغير وسينيالاوك و كيندير انا والفايسبوك بلا سقراط مايسواش ، والزغبي مارك خاصو يخلصك ناض بلوكاك بلوكيتيني بلوكوطوتيني ، ايوا نزلت نقرا الكومنتات عند عماد لقيت الدراري تايتعنبو ماشي على سقراط ماتفهمونيش غلط تايتعنبو على مراتو لالة غيثة الطريف الزين ومنافستي في الصدر الاعظم نساو سقراط والنضال و تايقولو غيثة مسكينة لمن خلاها خاصها الخلف .. ، ماتقلقش يا سقراط هذا حال اللي يتزوج مرا زوينة إيلا غاب الراجل يلقى اللي يشري لوليداتو دانون على وجه أمهم غبتي نهار على الفايسبوك بداو يتعنبو ليك على الطريف .

المهيم دخلت عند عماد قلت ليه تا أش ساير تقول سقراط غبروه ، قاليا ايييه… لبست جلابتي وهزيت عاوتاني بشكيليطتي و مشيت نجري لبروفايل سقراط لقيتو كاين رجع للكونت ديالو لدارو العبثية ووليداتو قلت ليه ياصكع ليام تا آش كان سبابك في عذابك قاليا واااالوووو نعاودها ليك كي لخرافة كتبت بوست على بن كيران لقيت الكونت طار

قلت ليه اميمتي على العدمي القنديلات صابوطاوه مادارو حساب التمغرابيت ما قالو عار الجار عل الجار ماخلاو السيد يفش قلبو .

ايييييه اللي دوا يرعف السينيال ولا من أسلحة البلطجة اللي قال شي كلمة ماعجباتهومش مايناقشوه مايقنعوه يقطعو لسانو ويغتالوه اغتيال افتراضي ايييييه السنيال هو في حقيقة الأمر ترهيب و إغتيال ، ايوا اشنو نقوليك اسقراط هذا حال الدنيا ياتقول كلام يعجب القنديلات يا تولي فاتي فلوغة و تبدا تبارطاجي وصفات إعادة الشباب و ازالة التجاعيد بالخميرة و هربل يا تكتب كيف تسعدين زوجك يا أختاه وإيلا بغيتي تكون جريء كتب على تبييض المناطق الحساسة بالبصلة و الكوفيتير ، انت اللي دافع الصدر وتاتقول انا ماتنبلوكي تاواحد وماتنمسح تعليقات تاواحد لأني أحترم حرية التعبير و أرى أن البلوك لضعاف الشخصية فقط و هانتا دير حرية التعبير مع اللي كيعرف على الحرية غير انها سميت بنت و التعبير غير انه كنا تنقراوه في الابتدائي احمد يأكل بالشوكة وفاطمة تأكل بيدها .

الحاصول ماعندي مانقول ليهم الهضرة طويلة والسكات خياااار كنحيي شجاعتك اخويا سقراط وراك عزيز .

المهم بغيت نرجع لبروفايلي لقيت الرويدة ديال البشكليطة تفشات وقفت نشد الطوبيس تابانت ليا مظاهرة دايزة في الفايسبوك هازين صورة مختار لغزيوي وتايقولو هذا عار هذا عار الحرية في خطر قلت اناري ميمتي اش واقع ؟ مشاو ليا للغزيوي … بديت نغوت في المظاهرة نعطي مليون على سمر اللون أسمر يا أسمراني مين قساك عليا دخلت وسط جوقة نسول قالو ليا واحد كاتب تدوينة تدعو لقطع رأس الغزيوي ووراوني السيد من نفس الكتائب اللي بغاو يخرسوا صوت سقراط اشنو كاتب واليكم النص كما كتبه في تدوينة : (

لو كنا مسلمين بمعناها الحقيقي لطردنا مثل هذا النوع من بلدنا لا وجود لمكانه قصد العيش بيننا هذا اقل ما يمكن فعله به اما مكانه الحقيقي هو قطع رأسه كما قال سيدنا محمد (ص) ).

تصدمت مشا ليا الصوت والصورة وبقا غير التشاش ، واهيا ناري راه اغتيال ناهض بدا غير بتدوينة وسالا بالدمايات تا احنا فين عايشين ؟؟ اشنو دار هاد الغزيوي باش يوصل التهديد لهاد الدرجة ؟؟!!!

مادار والو غير عبر على رأيو بحال كاع الناس مهما اختلفنا او اتفقنا معاه فهو فقط مجرد رأي لا اقل ولا اكثر ، اذن علاش هاد الناس كيهددو وكيسينياليو فكروني في قضية الراجل اللي كيضرب مراتو غير حيت ماعرفش باش يجاوبها حيت غلباتو بالكلام وبالحكمة وبالعقل والمنطق .

عمرني ماسمعت ان لغزيوي او سقراط سينيالاو شي بوست او هددو شي واحد و اللي قال لا يجيبليا دليل ، فعلا ان تصديهم للمتطرفين فكريا بالقلم فقط قمة قوة الشخصية اما اللي كيهدد و كيسينيالي فهو جبان وضعيف ولا حجة له ، العنف لا يصدر إلا على اشخاص مرضى نفسيين .

ومن هنا اوجه رسالة للمسؤولين لاتخاذ الاجراءات اللازمة لحماية حرية الفكر و الرأي .

رسائلي للكبار فهما لا الكبار سنا

الله يجيب اللي يفهمنا ولا يعطيناش.