كود – وكالات//

بزاف د الناس كيسحاب ليهم بلي وسائل منع الحمل كيتعلقو غير بالعيالات، ولكن كاين دابا واحد الابتكار جديد غادي يبدل هاد الفكرة كاملة، هاد البلان سميتو”ADAM”، وهو عبارة على واحد “الجيل” (Gel) مائي وما فيهش الهرمونات، صايباتو شركة ديال التكنولوجيا الحيوية سميتها “Contraline”.

هاد الجيل ما كيتدهنش على اللحم بحال البومادات، ولكن الطبيب كيحقنو بواحد العملية ساهلة وبسيطة بزاف تحت التخدير الموضعي، المفتاحة كدار نيشان وسط القناة اللي كدوزو منها الحيوانات المنوية.

ملي كيدگ هاد الجيل، كيدير واحد البراج تيمنع الحيوانات المنوية باش تخرج، والمزيان ف هادشي هو أن العملية ما كتقيسش القذف العادي ولا الإحساس الطبيعي، يعني كاع داكشي كيبقى هو نيت، أما الحيوانات المنوية اللي كيتحبسو، فالجسم كيذوبهم ويمتصهم بطريقة طبيعية بلا ما يديرو حتى مشكل.

هاد الجيل مصايب باش يدوم ف الجسم حتى لعامين (24 شهر)، وملي كتسالي هاد المدة، الجيل كيذوب بوحدو وكيتحول لماء وكيخرج من الجسم تلقائياً، هادشي كيعني أن الحيوانات المنوية كترجع تدوز عادي كيف كانت، داكشي علاش كيتعبر وسيلة آمنة، مؤقتة ومضمونة.

التجارب السريرية اللي داروها على هاد الجيل والمتابعة ديال الناس اللي جربوه عطاو نتائج كتشجع بزاف، هاد التجارب بينات بلي الجيل آمن وفعال، ومافيه حتى شي أعراض جانبية خايبة ولا مشاكل صحية كتخلع.