نجوى المالحي- كود//

تحت رعاية وزارة الصناعة والتجارة، كتنظم مجلة «أوطو نيوز Autonews» النسخة الثالثة من معرض السيارات المستعملة «أوطو أوكازيون Auto Occasion»، اللي غيتدار في أنفا بارك فالدار البيضاء من 10 حتى لـ 15 أكتوبر 2024.

هاد الدورة جاية باش تأكد على الأثر الإيجابي اللي حققوه الدورات السابقة، واللي ساهمو بشكل كبير فتعزيز عرض السيارات المستعملة، وكذا مواكبة النمو السريع ديال هاد القطاع، من خلال استضافة مختلف الفاعلين فمجال السيارات المستعملة، وكذا بزاف ديال الشخصيات المهمة من القطاعين العام والخاص.

النسخة الثالثة من «أوطو أوكازيون 2024» كتسعى باش تزيد تعزز دورها فهاد الإطار، وغادي تكون فمساحة كثر من 10.000 متر مربع، مع حضور عشرين عارض اللي كيمثلو أبرز الشركات في القطاع بحال شركات التمويل، التأمينات، وموردي قطع الغيار. وغادي توفر للزوار إمكانيات كثيرة باش يتجولو، يتسوقو، ويطلعو على جميع الخدمات المتوفرة.

بالإضافة، غادي يكونو ندوات حوارية لمناقشة التحديات والآفاق ديال سوق السيارات المستعملة في المغرب، اللي كيشهد نمو ملحوظ مع تزايد الطلب من المستهلكين. الأرقام كيبينو باللي المبيعات تزادو بزاف، من 400.000 سيارة فـ 2019 حتى لـ 700.000 سيارة فـ 2023، يعني نسبة نمو ديال 75%، ولكن الشركات المهيكلة كاتستفد غير من 2% فقط من هاد الحجم الكبير ديال المبيعات.

معرض «أوطو أوكازيون» هو فرصة مزيانة للزوار باش يكتاشفو مجموعة كبيرة من السيارات المستعملة، من الاقتصادية الصغيرة، لـ SUV، وحتى السيارات الفاخرة. هاد المعرض فضاء مفتوح للناس اللي كيقلبو على فرص اقتصادية مناسبة باش يشريو سيارة تتماشى مع ميزانيتهم، مع الاستفادة من المشورة والخدمات اللي كترفق عملية الشراء.