كود هند لكلاوي ///

شحال صعيبة تكون اكثر من شهرين من مراتك او صاحبتك وما تقدرش تقرب ليها او تقرب ليك بسباب فيروس. هاد الشي اللي وقع مع “كورونا فيروس”. حبس بلا جنس. هاد الشي وقع فدول كثيرة دارت الحجر الصحي للوقابة من انتقال هاد الفيروس القاتل. لاكسمان ناراسيمهان رئيس شركة “ريكيت بينكيزر”، مولات البريزيرڤاتيف  “دوريكس”، قال باللي شركتو بان ليها تراجع معدل ممارسة الجنس بسباب كورونا وفق ما نقلته “البي بي سي” النسخة العربية.

واكد ان هاد الشي لاحظو بسباب تراجع مبيعات البريزيرڤاتيف فكاع الاسواق تقريبا بما فيها البريطانية فشهر مارس. الرئيس قال باللي الحجر والسدان على الناس فديورهم قلل النشاط الجنسي وان حتى الجنس بين الازواج نقص على المعدل وباللي هاد الشي مظهر من مظاهر القلق.

الشركة قالت باللي الايطاليين حتى هما نقصو من الجنس. وتوقعات يكون عودة للمعتاد بعد بداية رفع بعض تدابير الحجر.

طبعا هاد الشركة ما هضراتش على المغرب. دابا تجمع كورونا مع رمضان يعني غادي ينقص بزاف. كلشي خايف على راسو باقي غير يقرب لشي حد. المغرب فبالاحياء الشعبية عندهم مشكلة اخرى. كاينة فئة عايشة فدار صغيرة او غير فبيت. هاد الفئة غادي يولي من المستحيل يديرو شي حاجة ايلى كان عندهم ولاد. كلشي حاضر ما كايناش الزنقة اللي يخرجو فيها لولاد او المدرسة وهنا الاستحالة ديالو.