سهام البارودي – كود//

شكون فينا ماسمعش ديك اللازمة ديال “المغرب بلد فلاحي” فحال داك الشعار ” المغرب اجمل بلد في العالم” يكفي أنك تكون مطلع شوية باش تعرف بأنه كيما مابينا و بين الجمال غير الخير و الاحسان( ماشي لدرجة أجمل بلد فالعالم) و راه نفس الشيء يسري على الفلاحة!

انا غانعرف بلي المغرب ماشي بلد فلاحي نهار غانحل خريطة المغرب و غايبان ليا بلي من غير الشمال و جزء من الغرب لي اخضر فالخريطة و ماتبقا ( الطرف الكبير) اصفر فحال شي صحراء قاحلة ! في حين الدول لي يمكن تقول على راسها دول فلاحية كاتلقا راسها اصلا اصلا معاوناها الطبيعة و الشتا خيط من السما على طول العام و فاش كاتشوفها كاتبان ليك مخضرة تبارك الله و الصلى على النبي.

باشمن وجه كانسميو على راسنا بلد فلاحي ؟ و حنا اغلب الفلاحة عندنا مازال كايعتامدو على تقنيات بدائية فممارسة المهنة ديالهم و حتى هادوك لي مدورين الصرف كاتلقا فئة كبيرة منهم ماقارينش و ماعندهم وعي بأهمية الحفاظ على البيئة ماكاين غا استغلال الفرشة المائية و المبيدات و عطيه العصير عطيه في كاس كبير عطيه حتى ولينا كانسمعو بلي هولاندا منعات شي شحنة ديال الليمون غادا ليها من المغرب بسبب استعمال مواد غير مسموح بيها فأوروبا!و غالبا ديك الشحنة لي رجعات من هولاندا ماشي بعيد تكون دابا كاتباع عصير فالمحلبات و خدامين ربات البيوت كايطحنوها و يديروها فالكونجيلاطور استعدادا لرمضان !

مايمكنش نسميو على راسنا بلد فلاحي غي حيت الفلاحة هي المشغل الأول فالمغرب ! حيت الاشتغال فيها بالنسبة لأغلب المياومين و العمال و العاملات الفلاحية راه ماشي عن اختيار ! الاغلبية كايمارسو المهنة مقابل دراهم معدودات فإطار توارث الزلط و الميزيرية تحت شعار حرفة بوك لا يغلبوك ، و فظروف مزرية و بلا وراق بلا ضمان اجتماعي فقط حيت ماكاينش البديل ! ماقراوش ! ماعندهم شي ديبلومات ! شي حرفة ! المدينة بعيدة ! فا كايتلاحو للفلاحة ! اذن حشومة نسميو راسنا بلد فلاحي غي حيت بزاف ديال الناس عندنا خصوصا العيالات كايتم استغلالهم فالضيعات الفلاحية، كل ساعة نسمعو بلي تگلب بيهم بيكوب فشي ڤيراج! حشومة

ماشي على اساس هادشي البرازيل كاتسمى قوة فلاحية ! ماشي على هاد الاساس ميريكان كاتسمى قوة فلاحية ! و نفس الشيء بالنسبة للاتحاد الاوروبي و للكوسطا ريكا و للشينوا … ماشي غير كاتجي و كاسمي على راسك بلد فلاحي لا ! خاص أولا تكون عندك استراتيجية فلاحية واضحة المعالم عارف راسك متخصص فكذا و كذا و عندك امكانيات تنتج قدا و قدا و تكون الفلاحة ديالك عصرية ماشي نفس الفلاحة لي كان كايدير الانسان البدائي فالعصر النيوليتي ( ما قبل ظهور الگرصون) ! و أنه الفلاح ديالك يكون قاري وواعي و عندو بالخصوص وعي كبير بالبيئة و تكون عندك صناعات مواكبة للقطاع الفلاحي و أهم حاجة باش تقدر تسمي راسك بلد فلاحي هي ماتكونش كاتخرا فسروالك الى شي عام ماصباتش الشتا ! واش نتا عوال على الشتا تصب ماتصبش و باغي تسمي راسك بلد فلاحي ؟ مايمكنش !

انا شخصيا كانشوف بلي فعلا المجال الفلاحي تقدم فالسنوات الأخيرة و فعلا ولينا كانشوفو زراعات جديدة و تقنيات جديدة فحال ليسير الشيء لي ساهم فدمقرطة لاڤوكا و الباباي و البانان و الآنون و بعض الفواكه لي كنا كانشوفوهم غي فالتلفزة و لكن هادشي ماكافيش باش نطلقو على راسنا لقب بلد فلاحي !