الرئيسية > آراء > مايمكنش رئيس اعتى دولة فالعالم دونالد ترامب كايتواصل بوسائل التواصل الاجتماعي و تويت واحد منو كايخري عباد الله فسراولهم و يجي شي سياسي فاشل يتهكم على الدور و القوة د وسائل التواصل ! آ سير حارب الأمية الديجيطالية ديالك
19/10/2020 17:00 آراء

مايمكنش رئيس اعتى دولة فالعالم دونالد ترامب كايتواصل بوسائل التواصل الاجتماعي و تويت واحد منو كايخري عباد الله فسراولهم و يجي شي سياسي فاشل يتهكم على الدور و القوة د وسائل التواصل ! آ سير حارب الأمية الديجيطالية ديالك

مايمكنش رئيس اعتى دولة فالعالم دونالد ترامب كايتواصل بوسائل التواصل الاجتماعي و تويت واحد منو كايخري عباد الله فسراولهم و يجي شي سياسي فاشل يتهكم على الدور و القوة د وسائل التواصل ! آ سير حارب الأمية الديجيطالية ديالك

سهام البارودي – كود//

وسائل التواصل الاجتماعي غادية و كاتكتاسح العالم ! القوة ديالها فاتت قوة الاعلام الكلاسيكي لي فيه التلفزة و الراديو و الجورنال و ولات هي الاعلام البديل  خصوصا فالدول ديال الله يحسن العوان لي الاعلام فيها يتخبط بين الوصاية د الدولة و الخوف د المستثمرين من الاستثمار فالاعلام المستقل! و نجحات انها توصل صوت عباد الله و هادشي ماخفا على حتى شي واحد بعقلو ! و حتى السياسيين ديال بصح فالدول لي فيها السياسة على حقها و طريقها راه كايستاغلو وسائل التواصل الاجتماعي و كاتلقاهم حاضرين بقوة فيها ! ترامب رئيس ميريكان اول قوة اقتصادية فالعالم كايتواصل مع المواطنين ديالو و مع العالم كامل بالتويتات ! تويت واحد ديال ترامب كافي باش يخري اعتى السياسيين فسراولهم و يجي واحد السياسي ديال الله يحسن العوان فدولة كاتتهجى ابجديات العمل السياسي ! واصل للحكومة بالشعبوية و قال الله قال الرسول و يتهكم على القوة ديال وسائل التواصل الاجتماعي و يبغي زعما يقلل منها ! و قاليك لا ” حنا دولة مؤسسات” !
فين كنتو آ سيموحمد فالعز د ازمة كورونا ؟! فين كنتي آ سي المؤسسات ؟!  ماشفناش السياسيين و الاحزاب خارجين للشارع كايأطرو عباد الله و كايمارسو “سياسة القرب” من المواطن ! ماشفناكمش كاتساهمو فالتوعية د الدوائر الانتخابية لي صوتو عليكم ! شفنا غي القياد و الباشاوات و العمال د صاحب الجلالة لي خدامين على قدم و ساق ! و ماكاينش لي فرش قلة الفايدة ديالكم قد هاد كورونا لي بيناتكم كعربازة و خرباقة ماعندكمش تا القدرة باش تواصلو مع وسائل الاعلام و المواطينين بشكل جيد ! ازمة التواصل لي كانت بين الحكومة و المواطنين المغاربة و الهفوات لي طرات فهاد كورونا راه خاصها تتقرا فالجامعات و لا يجمعها شي كاتب و يديرها فشي كتاب يسميه ” مئة خطأ في التواصل لا يجب القيام بها” و غاتولي شي بيست سيلر فالعالم كامل !
انا مافهمتش هاد الثقة فالنفس لي كايجيبوها السياسيين ديالنا منين كايجيبوها بالضبط؟! فدولة نسبة التصويت فيها واصلة للحضيض و معروف انه المواطن ماعندوش ثقة فالعمل السياسي و في ظل فشل الاحزاب السياسية في انها تخلق ثقة بينها و بين المواطن و انها تأطر المواطن لي فاش كاتحفى ليه كايخرج يغوت فشي فيديو ” بغينا سيدنا يعتقنا” ! نتا كسياسي راه خاصك تكون حشمان على عاراضك ! مارگ! مارگ من الفشل لي غارق فيه تال الودنين ! و هاكاك عندك القدرة انك تخرج عينيك فالمواطنين و تخبط عليهم الطوابل د البرلمان باش دافع على شنو فعز ازمة كورونا؟! على اجور منفوخة و تعويضات سمينة و تقاعد ماعمر باباه ماكان خاصو يتسمى تقاعد اصلا حيت التقاعد لي معروف فالعالم كامل هوا واحد السيستيم تايكوتيزي فيه الواحد باش يستافد منو فااااااااااش كايوصل لسن التقاعد يعني ستين عام الفوق حسب سن التقاعد المعمول به فالبلاد ! ماكاينش شي تقاعد كايشدو شي واحد عندو عشرين و لا ثلاتين و لا ربعين و لا خمسين عام ! و ماكاينش شي تقاعد كاتاخدو و نتا اصلا ماعمرك ماكوتيزيتي فيه اصلا ! هادشي لي كاتاخدو نتوما ماسميتوش تقاعد سميوه شي حاجة اخرى مثلا ” مرقة” ” گاميلة” ” هوتة” “باي” “تدويرة” “حوالة”… خاص شي سمية مناسبة !

واش فراسك آ سي السياسي المغربي بلي وسائل التواصل الاجتماعي اليوم كاتعرف المواطنين ديالك احسن منك ؟! عندها معلومات عليهم احسن منك ؟! عارفاهم شنو تعشاو و شنو تغداو و فاش كايتفرجو و فين دوزو الويكاند و فين خدامين وواش عندهم شي كريديات و لا لا ؟! واش عارف بلي وسائل التواصل الاجتماعي حققات داك القرب من المواطن لي ماعمرك نتا تقدر تحلم بيه! وولات قوة حقيقية تقدر توجه المواطن و تسيطر عليه و ديه فين بغات و راه كاينين بزاف د الامثلة ددول وسائل التواصل الاجتماعي فيها خلقات ازمات و ديكلونشات ثورات و خربقات نتائج انتخابات.. واش يصحابليك وسائل التواصل الاجتماعي هي ديك “كوكو… ماتنساش راحنا معروضين للعشا هاد الليلة عند سي الوزاني” لي كاتسيفط ليك المدام فماسنجر ولا؟! راه التيكنولوجيا هادي و اجرك على الله ! مافيهاش المرقة و غمق عليا نغمق عليك و قسم ردم و عطيني هاد الوزارة و خود نتا هادي ! التيكنولوجيا الفراشة ( بالشدة على الراء) لي جات باش تفرش كلشي على حقيقتو و تبين داكشي لي الاعلام و السياسيين كانو ديما كايخبيوه!

ايوا آ مولاي  الحمد لله على وسائل التواصل الاجتماعي و على القوة ديالها في إيصال صوت المواطنين لي كون عولو عليكم باش يوصل صوتهم كون كلاهم الدود ! و الشعبوية ماكاينش لي ستافد منها و كلا منها و شرب قد الاحزاب الاسلامية لي استغلات فقر و جهل الناس باش تغمق عليها بقال الله قال الرسول و شوية د اللحية نايضة بزغب الابطين باش يصوتو عليهم على أمل انهم غايخلقو التغيير المنشود !

موضوعات أخرى

01/12/2020 18:30

ضربة أمنية كبيرة للبوليس المغربي بالتعاون مع نظيره الأمريكي. حجز شحنة مهمة ديال الكوكايين فطنجة ساوية فلوس صحيحة – تصاور