گود سبور//

غاضبين مانشستر يونايتد النگليزي وما تسرطتش لهم أن الجامعة الملكية المغربية لكرة القدم، خدات لهم الدولي المغربي نصير مزراوي، اللي جا لمعسكر المنتخب الوطني المغربي استعدادا لكاس أفريقيا اللي غادي تبدا الاثنين الجاي 21 ديسمبر، وما بقاش معهم حتى يلعب معهم الماتش ضد بورنموث الاثنين الماضي ضمن منافسات بطولة النگليز.

وحسب شبكة BBC Sport فمانشستر يونايتد كاعيين حيث الجامعة الملكية المغربية للكرة، ما خلاتش نصير مزواري يبقى معهم حتى يلعب الماتش الاثنين ضد بورنموث، وحيث احترمت الموعد اللي علن عليه الاتحاد الدولي لكرة القدم لالتحاق اللاعبين بالمنتخبات ديالهم المشاركة فـ كاس إفريقيا وهو يوم الاثنين 15 ديسمبر 2025، نفس اليوم اللي كانو لاعبين فيه مانشستر يونايتد الماتش ديالهم.

وكشف نفس المصدر أن مانشستر يونايتد راسلو الاتحاد الدولي لكرة القدم، بخصوص نصير مزواري، ولكن الفيفا ما تدخلوش باش يفرضو على الجامعة الملكية المغربية لكرة القدم التراجع على استدعاء نصير مزراوي يوم 15 ديسمبر، وهذا الشي تسبب فـ غضب داخل النادي اللي كايحسو بالظلم.