كود – كازا ///

قالت جريدة “20 مينوتوس” الإسبانية، أن شابة ف عمرها 21 عام حاولات تنصب على وكالة عقارية ف برشلونة باسم نجلة السفير المغربي ف واشنطن، قبل ما تتصل هاذ الوكالة العقارية بالسفارة المغربية ف ميريكان وتأكدات رسميا أن السفير عندو غير ولد واحد.

وف تفاصيل القضية، اتصلات هاذ خايتي اللي مامعروفش أصلها منين بوكيل عقاري عندو شقق ف منطقة باسيو دي گراسيا وهي المنطقة الأكثر تكلفة ف برشلونة. وقدمات راسها بأنها طالبة وغادي تحتاج تسكن ف شقة كراها كيوصل 5000 يورو للشهر.

وحسب الوكيل العقاري اللي اتصل به طاقم برنامج آنا روزا، قامت الشابة بحجز العقار وقدمات إثبات مع تحويل بنكي، لكن بعد وضع بند إجمالي الإيجار السنوي المستحق ف حدود 50 ألف يورو، جات الشابة للوكالة وصرحات أن أسباب بنكية تمنعها من تحويل المبلغ كاملا وغادي تدوز ليهم غير 17 ألف يورو ف انتظار حل المشكل.

لكن السيدة غبرات وما بقى ليها أثر والهضرة ديالها على التحويلات البنكية صدقات غير كذوب. وعندما لم ترد الشابة على أي اتصالات، اتصلت الوكالة بالولايات المتحدة للاتصال بالسفير، وتوصلو بالجواب التالي : “السيد يوسف عمراني لديه ابن واحد فقط”.