كود سبور//

غادي يستمر الوداد الرياضي فأجواء الاستعداد، وما غاديش يرتاح الفريق الأحمر حيث عندو ماتش يوم الأربعاء الجاي فطنجة ضد فريق اتحاد طنجة، ضمن مؤجل الجولة 5 من البطولة الاحترافية لكرة القدم.

وغادي يديرو اللعاب ديال الوداد الرياضي تحت إشراف المدرب الحسين عموتة، حصة تدريبية اليوم الاثنين فتيران بنجلون فكازا باش يحيدو لعيا ديال ماتش البارح ويستمرو فأجواء التركيز والحماس اللي راهم عليها، من بعد الانتصار الكبير فالعصبة والتأهل للدور الجاي، ويستعدو أيضا لماتش حسنية أكادير فالبطولة.

وغادي يلعب الوداد الرياضي اللي كيقلب على صدارة البطولة الاحترافية مع اتحاد طنجة اللي غارق فأسفل الترتيب يوم الأربعاء فطنجة، وغادي يرجع لكازا باش يوجد لماتش الديربي ضد الرجاء الرياضي الأحد الجاي فتيران مركب محمد الخامس، ضمن مؤجل الجولة 6 من البطولة.