كود سبور//

بدا بطل إفريقيا الوداد الرياضي كيوجد للماتش روتور ضد ريفيرز يونايتد النيجيري اللي غادي يتلعب الويكاند الجاي فستاد دونور، ضمن الدور 32 من دوري أبطال إفريقيا باش يحقق الرباح ويتأهل ليكروب.

حامل لقب دوري أبطال إفريقيا وصل اليوم إلى المغرب، وانطلق مباشرة فالاستعداد لماتش الروتور، وخاض حصة تدريبية فتيران بنجلون تحت إشراف المدرب الحسين عموتة.

الحصة التدريبية ديال هذا العشية، ركز فيها الطاقم التقني ديال الحمرا على إزالة عياء ماتش البارح من اللعابا وسفر رحلة نيجريا، والرفع من مستوى اللياقة البدنية ديال الكابيتان يحيى جبران وصحابو اللي دخلو فالتركيز على ماتش الروتور.

وغادي يدخل الوداد الرياضي فبروكرام ديال البريبراسيون والخدمة يوميا من غدا الثلاثاء حتى موعد الماتش الأحد الجاي، من أجل التحضير للماتش اللي مطالب فيه بطل إفريقيا بتحقيق الفوز على ريفرز يونايتد النيجيري بهدف واحد لصفر على الأقل من،  للتأهل لدور ليكروب من المسابقة ومواصلة مشوار الدفاع على اللقب، من بعدما خسر ماتش الألي بنتيجة 2 مقابل 1.