كود كازا ////

حدث كبير ففرانسا وفالفلاحة فاوربا غادي يكون فيه المغرب ضيف شرف. كيتعلق الامر بالمعرض الدولي للفلاحة للي كتحتاضنو باريس كل عام. غادي يفتاتح يوم 22 فبراير ويختاتم يوم 2 مارس. حدث كبير لانو كيولي حديث الساعة ففرانسا. موضوع الفلاحة استراتيجي. توظيف السياسيين ليه كبير فدولة كتعيش اللا استقرار السياسي من هادي اشهر.

تاريخيا هاد المعرض كيشد انتباه كلشي. فدورة 2025 كيعرض فيها الف عارض وتحضر فيها 4 الاف حيوان على 16 هكتار. بلادنا غادية تكون اول دولة كتحضى بهاد القضية ديال ضيف شرف.

الرواق المغربي غادي يكون على 476 متر مربع. فيه غادي تشرف على التنظيم وزارة الفلاحة من خلال وكالة التنمية الفلاحية. المغرب غادي يعرض فهاد المساحة كل تاريخو وحاضرو الفلاحي. وزير الفلاحة احمد بواري اللي عارف القطاع مزيان٬ غادي يوجد هاد الحدث باش يدوز فاحسن الظروف

الرئيس الفرنسي ايمانويل ماكرون اللي كيفتاتح هاد المعرض غادي يزور الرواق المغربي. الوزير الاول بايرو غادي حتى هو يزور رواقنا فاليوم الثاني.

يتوقع حتى سياسيين من الاغلبية والمعارضة غاديين يزورو الرواق المغربي. زيارات باش تبين العلاقات الجيدة بين باريس والرباط