الرئيسية > آراء > ماكايناش شي حاجة سميتها الاساتذة الذين فرض عليهم التعاقد ! واش كانو هازين عليكم الهراوات فاش كنتو كاتسنيو ؟
22/02/2019 11:00 آراء

ماكايناش شي حاجة سميتها الاساتذة الذين فرض عليهم التعاقد ! واش كانو هازين عليكم الهراوات فاش كنتو كاتسنيو ؟

ماكايناش شي حاجة سميتها الاساتذة الذين فرض عليهم التعاقد ! واش كانو هازين عليكم الهراوات فاش كنتو كاتسنيو ؟

سهام البارودي – كود//

اولا و قبل كل شيء ! باش نتافقو على المفاهيم ! ماكايناش شي حاجة سميتها ” الاساتذة الذين فرض عليهم التعاقد ” ! واش الدولة اختاطفاتكم مع الثلاتة د الصباح من ديوركم فلاندوفيرات و داتكم سناتكم بزز على العقود ؟ طبعا لا !
واش سيفطات ليكم المرود هازين الزراوط باش تسنيو دوك العقود ؟ طبعا لا

ياك مشيتو بيديكم دوزتو الامتحان ديال التعليم بالتعاقد ! هاكا كانت مكتوبة كبيرة قدها قداش قداكم ! ياك سنيتو الكونطرات بخاطر خاطركم.

ايوا علاش كاتسميوها ” فرض عليهم التعاقد ” ؟

و بلا ماتقوليا ديك الاسطوانة ديال حگا و الواد ” فرض عليهم التعاقد” حيت ماكانش عندهم الاختيار يا إيما التعاقد يا إيما الشوماج ! هادشي سميتو الكذوب و التبوحيط و نكيح المنطق. طبعا كان عندك الاختيار ! و ديما عندك الاختيار فالحياة !

-الاختيار الاول بعدا هوا تقرا مزيان و تجيب نقط مزيانة تخول ليك توسع دائرة المهن لي تقدر تمارس حيت التعليم كلشي باغي يديرو و كايبقا الاختيار السهل و البسيط.

– الاختيار الثاني فالحياة هوا انك دير توجه لي عندو آفاق فالبلاد لي نتا عايش فيها ! واش نتا عايش فالمغرب و باغي طفرو بالاجازة فالحقوق و لا الأدب العربي ؟ راه ماكاينش هادشي ! الوقت بغات المهندسين و التقنيين و الحرفيين و الناس لي عندها الحس ديال المقاولة و المغامرة فالحياة

-الاختيار الثالت لي عندك ! هوا تخدم فالقطاع الخاص ، مدرسة خاصة او سونطر دابيل، او دير مشروع بوحدك او نتا و صحابك ديال السوايع الاضافية !

مالهم السوايع الاضافية ؟ مالها المقاولة ؟ مالو القطاع الخاص ؟ مالها تتعلم حرفة ؟ او تقرا لغة جديدة ؟ او تحاول تتعلم حوايج جداد تخدم بيهم ؟ عصر الانترنيت هذا و كلشي متوفر خاص غا تكون سيدي و مولاي!  واش كاتشوف راسك نتا احسن من الناس لي دارو هادشي ؟ طبعا نتا ماشي احسن منهم !

علاش كاتحسسوني بلي راكم كاتحاربو اي حاجة فيها ريحة المردودية و الاستحقاق ؟

العالم كلو كايتبدل و حتى مفهوم العمل كايتبدل ! مشاااا وقت الوظيفة العمومية و المانضا و ندكو فالدولة ! و الصالير دايز دايز سوا خدمت سوا ماخدمتش ! وا الاستاذ ! واا الموعليم ! راه خاصك تفهم بلي ماكاينة فتاشي بلاد هاد القضية ديال تسني كونطرا و تنوض تغوت و تهلل على عيباد الله باش يبدلوها ليك و بلي الدولة ماشي مسؤولة انها تخدكم فالوظيفة العمومية ! الوظيفة العمومية ماشي حق ! الدولة مسؤولة انها تجيب ليك استثمارات ! شركات خاصة ! و تخلق مناخ مزيان للاعمال و المقاولات باش بنادم يتحرك على راسو و يحوفر و يضرب تامارا !

واش غانبقاو العام لي جا يلقانا باغين نوليو أساتذة و بوليس و فراملية !؟ مايمكنش !

موضوعات أخرى

24/06/2019 15:00

صفقة القرن الفلسطنيين وماعارفينش شنو فيها وباقا متعرضات عليهم والمغاربة حيت عندهم الداكا دايرين مظاهرة ضدها، راه إلى بغا الواحد يضرب دورة فالرباط راه ميمنعو حد، ماشي ضروري يعطي لهاد الدورة طابع نضالي

24/06/2019 14:49

بلفقيه زعيم المعارضة فكلميم فحوارو مع “كود”: غاديين ندعمو مباركة بوعيدة وما غادي نترشح حتى لشي منصب وراه ما ساكتش خوف ها علاش ساد فمي