سهام البارودي – كود//
كاين شي مغاربة عزيز عليهم يتقدّاو الحوايج من الجوطية حيت كايعتابر بلّي فيها المليح و الماركات و بثمن مناسب! كايقوليك شوف شوف هاد النايك ؟ قوليا نتا بشحال ؟ خاصك ديما تقوليه شي ثمن كبير بزاف باش يحس براسو مضبّر على همزة و كايقوليك ” هادي دابا بخمسين درهم ! من الجوطية ! و الله يمّاك و ماحطيتي ربعين الف لاشريتيها من الحانوت “.
و كاينين شي مغاربة عزيز عليهم يتقدّاو الافكار من الجوطية د العالم ! دوك الافكار القدام العبيطة د النازية و ما قبل الحرب العالمية عاد فاقو و بداو كايتداولوهم ! دابا قاليك ضد زواج المغربيات من الاجانب حفاظا على العرق المغربي النقي ! على شنو شنو الله يرحم البّاك ؟ العرق المغربي النقي ! آشمن عرق واشمن نقاء ؟ بوحدهوم هاد الناس لي عارفين ! كايتخايلو مساكن ! كايتخايلو راسهم فحال دوك النازيين الجرمان لي كل واحد فيهم فيه جوج ميترو فالطول، صحاح و طوال و قرفادتهم غوز و كايصنعو الڤولسڤاگن و كايصوگو الماطر كبار باغين يحافظو على “النقاء” !بالرغم من انه هاد الفكرة علميا و جينيا غالطة ! و لكن لنفرض گاع كاين شي شعب زعما عندو شي عرق سبيسيال راه ماغانكونوش حنا هوما داك الشعب ! المغاربة شعب عادي جدا و بسيط جدا ماعندوش شي حاجة سبيسيال غايبغي زعما يحافظ عليها و لا غاتمشي ليه الى تخالط باجناس اخرى ! آش عندنا ؟ شي ذكاء خارق صنعنا بيه المركبات الفضائية ؟! شي حس د التجارة خارق درنا بيه التجارة و جبنا بيه الفلوس ! شي قوة جسمانية خارقة كاتخلينا ندردكو على عباد الله فالالعاب الاولامبية ؟! والو ! ماعندنا حتى حاجة خارقة غانبغيو زعما نحافظو عليها ! شعب درويش جدا ! بسيط جدا ! متوسط جدا ! هالكو الزلط و خارج عليه فحال گاع الشعوب لي هالكها الزلط ! غير الحياة اليومية ديالنا تعطيك الخبار ! التقدية ديالنا تعطيك الخبار ! ايه عندنا عادات و تقاليد و فولكلور ولكن تاهي كاتبدل و تطور مع الوقت فحال گاع الشعوب ! راه قيصر روما كون يسيق الخبار بلي الطاليان دابا ماطيشة اساسية فالعادات الغذائية ديالهم مع الباسطا و البيتزا غاتشدو السخفة حيت ماعمرو شاف هوا ماطيشة فالعهد ديالو فالطاليان ! ماكانتش من العادات دداك الوقت !
ديك النهار كانتفرج فواحد الحفلة ديال عبد المجيد عبد الله فالبحرين و كانشوف العيالات و الرجال فالخليج كيفاش زينين و مرفحين و كايبان عليهم مظاهر الترف و البذخ، بشرات صافية، ظفار دايزين على المانكير ، حوايج فاخرة، شعر مسبسب ، وجوه دايزة على مشرط الجراح باش يصلح ما افسده الزمن و الزلط د الجدود و الجو د الصحرا و الشموش ! واعرين ! ناضيين ! قلت مع راسي تاحنا المغاربة و الله الى خاصنا غا الفلوس ! ماخاصنا لا هضرة د العرق النقي لا تاخرية من هاد الايديولوجيات د بنادم المسالي قبّو ! خاصنا الفلوس تاحنا و نزيانو و نرتاحو و ديك الساعة بنادم غاينقص الهضرة الخاوية و غايديها فترمتو !
